Rosatom Qazaqstanda Túrkııadaǵydaı syzbany qoldanbaıdy

ASTANA. KAZINFORM – Birinshi AES-ti paıdalanýdy Qazaqstan mamandary qamtamasyz etedi. Bul týraly Atom energetıkasy jónindegi agenttikten málim etti.

— Joba kommertsııalyq sıpatta. Qarjylandyrý vendorlardyń esebinen qamtamasyz etiledi. Qarjylandyrý qurylymy áli kelissózder kezeńinde. AES qurylysynyń sońǵy qunyn anyqtaý — kópqyrly protsess. Munda sheshýshi róldi halyqaralyq jetkizýshilermen júrgiziletin kelissózder sharttary men jobalyq qujattamany ázirleý, ınjenerlik izdenister nátıjelerinen keıin anyqtalady. Tek osy kezeńder aıaqtalǵannan keıin ǵana jobaǵa arnalǵan naqty bıýdjet naqtylanady, — dedi agenttikten BAQ ókilderiniń saýalyna oraı.

Agenttik Túrkııada Reseı AES-ty ózi salyp, ózi paıdalansa, Qazaqstanda mundaı shema qoldanylmaıtyndyǵyn aıtady. 

— Joba kommertsııalyq sıpatqa ıe. Rosatom konsortsıýmnyń jetekshisi jáne basqa da vendorlarmen qurylys jumystaryn júzege asyrady. Al AES — ulttyq nysanymyz jáne paıdalanýdy Qazaqstannyń óz mamandary qamtamasyz etedi, — dedi vedomstvodan.

Buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik. 

Sonymen qatar Atom energetıkasy jónindegi agenttik tóraǵasy Almasadam Sátqalıev Qazaqstandaǵy taǵy bir AES-ti qytaılyq vender salatynyn málim etti.

AES-ten óndiriletin elektr energııasynyń quny JEO men JES-ten alynatyn elektr energııasyna qaraǵanda joǵary bolady.