«Rosatom» basshysy Qazaqstanda AES salýǵa qatysý múmkindigine pikir bildirdi

ASTANA. QazAqparat – Reseılik «Rosatom» memlekettik korporatsııasynyń basshysy Alekseı Lıhachev kompanııanyń Qazaqstandaǵy AES qurylysyna qatysý yqtımaldyǵy týraly pikir bildirdi, dep habarlaıdy QazAqparat tilshisi.

«Biz árdaıym tapsyrys berýshiniń qolyndamyz. Tapsyrys berýshige, Qazaqstan basshylyǵyna qalaı qolaıly bolsa, jobany solaı ıkemdep, solaı jumys isteımiz», - dedi ol Reseıde ótip jatqan «ATOMEKSPO-2022» atty halyqaralyq forýmda.

Sondaı-aq, Alekseı Lıhachev «Rosatomnyń» Qazaqstanmen áriptestikti nyǵaıtýǵa múddeli ekenin jetkizdi.

«Biz úshin Qazaqstanmen áriptestiktiń orny bólek. Tarıhı turǵydan alsaq, biz bir «atom áýletinen» taraımyz. Qazaqstanda atom jobasyn lezde ári tıimdi jolǵa qoıatyn mamandar az emes. Biraq taǵy bir qaıtalap aıtqym keledi, bul jobanyń keleshegin tek tapsyrys berýshi tarap qana, ıaǵnı Qazaqstan Prezıdenti men Úkimeti sheshedi», - dedi Alekseı Lıhachev.