«Rosatom» basshysy: AES qurylysy kezinde jergilikti kompanııalarmen jumys isteýge daıynbyz
QONAEV. KAZINFORM - Almaty oblysy Úlken aýylynyń mańynda AES qurylysy resmı túrde bastaldy.
«Rosatom» memlekettik korporatsııasynyń bas dırektory Alekseı Lıhachev Qazaqstandaǵy alǵashqy atom elektr stantsııasynyń qurylysyn bastaý rásiminde Úlken aýylyn jarqyn bolashaq kútip turǵanyn aıtty.
— Biz qýatty da zamanaýı atom elektr stantsııasyn Qazaqstan Respýblıkasynda salýǵa baǵyttalǵan jobany júzege asyrýǵa kirisemiz. Qazaqstannyń atom salasynda mol tájirıbesi bar. El ýran óndirý kólemi boıynsha álemdegi jetekshi orynǵa ıe — planetadaǵy barlyq ýrannyń shamamen 40%-y osynda óndiriledi, — dedi ol.
Sondaı-aq Alekseı Lıhachev 1940-jyldardan beri Qazaqstan men Reseı arasynda atom ǵylymy salasynda áriptestik ornaǵanyn eske saldy.
— Aqtaýda ónerkásiptik VN-350 reaktory bolǵanyn jaqsy bilemiz. Bul stantsııa birden úsh mindetti oryndady: qalany elektr qýatymen, jylýmen jáne taza aýyz sýmen qamtamasyz etti. Árıne, ol kezde bul óńir - Keńes Odaǵynyń eń jaıly aımaqtardyń biri boldy. Men Úlken aýlynyń bolashaǵy sondaı bolady senemin, — dedi ol.
Meıman «Rosatom» Qazaqstanda shynymen de ozyq qondyrǵy — VVER-1200 reaktory bar energetıkalyq blok quratynyn atap ótti. Aıtýynsha, mundaı bloktar qazirdiń ózinde Reseıde sátti jumys istep tur: 4 reaktor eldiń ortalyq óńirlerin turaqty jasyl energııamen qamtamasyz etse, 2 reaktor Belarýste jumys isteıdi. Uqsas jobalar Vengrııada, Mysyrda, Qytaıda jáne Túrkııada «Rosatomnyń» tikeleı qatysýymen júzege asyrylyp jatyr.
— Qazaqstanda biz eń ozyq mashına jasaý, aspap jasaý jáne basqarý júıelerin qurý tehnologııalaryn tarta otyryp, halyqaralyq jobany júzege asyrýǵa daıynbyz. Jumystyń qomaqty bóligin — 30%, tipti odan da kóp mólsherin — Qazaqstan kásiporyndarymen birge iske asyrýǵa nıettimiz. Árıne, bul úshin qazaqstandyq kompanııalar oryndaıtyn jabdyqtar men jumystardyń tolyq qaýipsizdigin jáne olardyń biliktiligin dáleldeý qajet. Biraq biz bul jobany júzege asyrýǵa qazaqstandyq óndirýshilerdi tartýǵa daıynbyz, — dedi ol.
«Rosatom» basshysy kadr daıarlaý máselesine de toqtaldy.
— Qazaqstan — atom ǵylymy men tehnologııalary salasyna jańa kelgen el emes. Munda 3 zertteý reaktory jumys isteıdi, sonyń biri Almaty oblysynda ornalasqan. Biz ǵylym akademııalarymen, ıAdrolyq fızıka ınstıtýtymen, sondaı-aq ulttyq ýnıversıtetterdi qosa alǵanda, jetekshi joǵary oqý oryndarymen tyǵyz baılanystamyz. Olar osy joba úshin mamandardy daıarlap keledi jáne daıarlaı beretin bolady, — dedi Alekseı Lıhachev.
Eske salaıyq, buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik.
Búgin Qazaqstanda alǵashqy AES qurylysy resmı túrde bastaldy.