«Rosatom» álemde birinshi bolyp AES reaktoryndaǵy radıoaktıvti qaldyqtardy jaǵyp jiberdi
ASTANA. KAZINFORM – «Rosatom» reaktorlardaǵy paıdalanylǵan ıadrolyq otyn quramyndaǵy qaýipti elementterdi «qaıtalap jaǵý» boıynsha álemdegi alǵashqy baǵdarlamany aıaqtady.
Mınorly aktınıdter – amerıtsıı-241 jáne neptýnıı-237 sáýlege shaldyqqan ıadrolyq otynda (SıAO) kezdesetin eń radıoaktıvti jáne uzaq ómir súretin komponentter. 2024 jyldyń jazynda bul mınorly aktınıdter MOX-otynyna (plýtonıı oksıdteri men azaıǵan ýran qospasynan turatyn ıadrolyq otyn) qosylyp, Beloıarsk AES 4-blogynyń belsendi aımaǵynda synaldy.
Úsh otyndyq mıkro-naýqandy qamtıtyn jumys tsıkli sátti ótti. Sáýlelengen jınaqtar arnaıy saqtaý basseıninde salqyndaǵannan keıin arnaıy saraptamaǵa jiberiledi.
Aıta ketý kerek, mınorly aktınıdterdi energetıkalyq reaktorlarda «qaıta jandyrý» arqyly joıý – tórtinshi býyn atom energetıkasyn qurýdaǵy negizgi element.
- Neptýnıı, amerıtsıı, kıýrıı sııaqty elementter sáýlelendirilgen otyn massasynyń az ǵana bóligin quraıdy. Biraq onyń radıoaktıvti ýyttylyǵy men ydyraý jylýyna proportsıonaldy emes mańyzdy úles qosady. Olardyń bolýy qaldyqtardy qorshaǵan ortadan oqshaýlaý ýaqyty men sharttaryn anyqtaıdy, - delingen Reseı memlekettik atom korporatsııasy baspasóz qyzmetiniń málimdemesinde.
Bolashaqta MOX-otyny jınaqtarynda mınorly aktınıd mólsherin kóbeıtý josparlanǵan.
- Budan basqa, biz jyldam reaktorlarǵa arnalǵan nıtrıdti SNÝP-otynyna kishi aktınıdterdi qosýdy, sondaı-aq «mınorly» otyndardyń geterogendi janýyn synaýdy josparlap otyrmyz. Bul jaǵdaıda mınorly aktınıdter ýran-plýtonıı otynymen «aralastyrylmaı», reaktordyń belgili bir aımaqtaryna ornatylatyn bólek tvelder nemese jınaqtarǵa ornalastyrylady, - dep túsindirdi Rosatomnyń «TVEL» otyn kompanııasynyń ókili Aleksandr Ýgrıýmov.
Osyǵan deıin «Rosatom» Irandaǵy AES-tegi jumysyn toqtatqanyn habarladyq.
