Ronaldýdyń fızıkalyq daıyndyǵy dárigerlerdi tańǵaldyrdy
ASTANA. QazAqparat - «ıÝventýstyń» dárigerleri shabýylshy Krıshtıaný Ronaldýdyń dene múmkindikterin 20 jastaǵy fýtbolshymen salystyrdy, dep habarlaıdy «SPORTINFORM» SAA.
33 jastaǵy portýgalııalyq oıynshy týrındik klýbta medıtsınalyq tekserýden ótti. «Ronaldýdyń denesindegi maıdyń úlesi - 7%. Ádette, onyń jasyndaǵy sportshylarda bul kórsetkish ortasha 10-11% aralyǵynda bolady. Bulshyqetteri dene salmaǵynyń 50 paıyzyn quraıdy (ortasha kórsetkish - 46%)», - dep tańǵaldy ony teksergen dárigerler.
Marca basylymynyń jazýynsha, 2018 jylǵy Álem chempıonatynda Ronaldý saǵatyna 33,98 kılometr jyldamdyqpen júgirip, týrnırdegi eń júırik oıynshy atanǵan bolatyn.
Budan tys, Ronaldý toptyq kezeńniń alǵashqy týrynda Ispanııa qaqpasyna úsh gol soǵyp, álem chempıonattary tarıhyndaǵy eń jasy úlken het-trık avtory boldy.
Bir aıta keterligi, ol «ıÝventýsqa» aýysqannan keıin, týrındik klýbtyń aktsııalary 35% qymbattady, al «Real Madrıdtiń» Týıtterinen mıllıonǵa jýyq jazylýshy shyǵyp ketti. «ıÝventýstyń» Ronaldýǵa berilgen 7-shi nómirli jeıdeleri satylymǵa shyqqan soń, alǵashqy táýlikte oıynshy transferlik qunynyń jartysyna jýyq qarjy jınalǵan.
