Ronaldý ulttyq qurama sapynda 200 ret alańǵa shyqqan tuńǵysh fýtbolshy atandy
ASTANA. QazAqparat – Portýgalııa quramasynyń shabýylshysy ári kapıtany Krıshtıaný Ronaldý 2024 jylǵy Eýropa chempıonatynyń irikteý týrnırinde Islandııamen syrt alańdaǵy matchta óz komandasyn bastap shyqty, dep habarlaıdy QazAqparat tilshisi.
Bul 38 jastaǵy K.Ronaldýdyń ulttyq qurama sapyndaǵy 200-inshi oıyny. Sóıtip portýgalııalyq shabýylshy fýtbol tarıhynda osyndaı kórsetkishke qol jetkizgen birinshi oıynshy atandy. Buryn rekord kýveıttik Bader al-Mýtavaǵa tıesili edi. Ol óz quramasynyń sapynda 196 kezdesý ótkizdi.
Aıta keteıik, Portýgalııa quramasy J tobynda 3 oıynnan keıin 9 upaı jınap, jekedara kósh bastap keledi. Qarsylastar qaqpasyna 13 dop soqsa, ózderine birde-bir gol ótkizgen joq.
Qazirgi sátte portýgalııalyqtar Islandııamen oınap jatyr.
