Ronaldý sońǵy álem chempıonatyna qatysty málimdeme jasady

ASTANA. KAZINFORM – «Ál-Nasr» fýtbol komandasynyń kapıtany ári shabýylshysy Krıshtıaný Ronaldý 2026 jyly Kanada, Meksıka jáne AQSh-ta ótetin mýndıal onyń quramamen qatysatyn sońǵy álem chempıonaty ekenin aıtty. 

Áıgili fýtbolshynyń málimdemesi ıspanııalyq Mundo Deportivo gazetinde jarııalandy. 

– Iá, bul – meniń Portýgalııa quramasymen qatysatyn sońǵy álem chempıonatym. Ol kezde meniń jasym 41-de bolady. Ázirge men tek osy sáttiń raqatyn sezingim keledi, - dedi Ronaldý Saýd Arabııasyndaǵy TOURISE týrıstik forýmynda sóılegen sózinde. 

Osy sózinen keıin Ronaldý spottyq mansabyn aıaqtaý jaıly alyp-qashpa áńgimege de ázilmen jaýap berdi. 

– Kópshilik «jaqynda» degen sózimdi shamamen 6 aı nemese 1 jyl aralyǵy dep túsinedi. Al, ol 10 jylǵa jýyq ýaqytty qamtýy da múmkin, - dep ázildedi «Altyn doptyń» bes márte ıegeri. 

Degenmen Krıshtıaný «belgili bir jasqa jetken kezde aılar tezirek ótip jatqandaı seziledi» dep aǵynan jaryldy. Alaıda ol áli de babynda ekenin, «Ál-Nasr» komandasynda da, Portýgalııa quramasynda da gol soǵyp júrgenin jáne jasyl alańdaǵy oıynnan erekshe lázzat alatynyn atap ótti. 

Aıta keteıik, buǵan deıin Krıshtıaný Ronaldý goldar sany boıynsha álemdik rekordty jańartqanyn jazǵan edik. 

Kamıla MÚLІK