Ronaldý EÝRO-2016 dodasyndaǵy jeńisti óz mansabyndaǵy eń keremet sát dep atady
ASTANA. QazAqparat - Fýtboldan Portýgalııa quramasynyń kapıtany Krıshtıaný Ronaldý bıylǵy Eýropa chempıonatyndaǵy jeńis onyń kásibı mansabyndaǵy eń keremet sát ekenin moıyndady. Bul týraly Ronaldý matchtan keıin aıtty. Onyń bul sózderin Eýropalyq fýtbol qaýymdastyǵynyń resmı saıty keltirdi, dep jazdy TASS.
Jeksenbi kúni Eýropa chempıonatynda Portýgalııa quramasy qosymsha ýaqytta Frantsııa komandasyn 1:0 esebimen jeńdi. Krıshtıaný Ronaldý jaraqaty saldarynan matchtyń 25-shi mınýtynda oıynnan shyqty.
"Frantsııa komandasyn jeńgenimizge qýanyshtymyn. Bul meniń kareramdaǵy eń keremet jáne baqytty sátterimniń biri. Ulttyq quramamen bas júldege ıe bolyp, tarıhta iz qaldyrýdy armandaıtynymdy árdaıym aıtyp júrdim. Oǵan qol jetkizdim", - dedi portýgalııalyqtardyń kapıtany.
"Komanda boıynsha joldastaryma, bapkerge, biz úshin alańdaǵan barsha portýgalııalyqtarǵa alǵys aıtqym keledi. Bul men úshin jáne Portýgalııa halqy úshin erekshe sát. Biz bul jeńiske laıyqpyz", - dep qosty Ronaldý.
Krıshtıaný Ronaldý Eýropa chempıonattaryndaǵy fınal oıyndaryna qatysý boıynsha rekordsmen atandy. Ronaldý 21 oıyn ótkizgen, osylaısha ol frantsýz Lılıan Tıýramnan jáne gollandııalyq Edvın van der Sardan tórt oıyn artyq oınaǵan.
