Ronaldý bastaǵan Portýgalııa quramasy álem chempıonatyn teń nátıjemen bastady
ASTANA. KAZINFORM — Fýtboldan 2026 jylǵy álem chempıonatynda K tobynda synǵa túsip jatqan Portýgalııa men Kongo Demokratııalyq Respýblıkasy quramalary kezdesýiniń nátıjesi belgili boldy.
Jankúıerler bul kezdesýde portýgalııalyq qurama jeńiske jetedi dep boljaǵan edi.
Krıshtıaný Ronaldý bastaǵan jigitter afrıkalyq komanda op-ońaı tize búktiredi degen oıda bolǵany jasyryn emes. Soǵan qaramastan oıyn tarysty jaǵdaıda ótti.
Kezdesý barysynda alǵashqy mınýttan Portýgalııa quramasy belsendilik tanytqan edi.
Jyldam gol soǵý múmkindigin izdegen olar dittegen maqsatyna jete almaı jatty. Osyndaı sátterdiń birinde olardyń qatarynan Joaý Nevesh 6-mınýtta kózdegen nysanadan múlt ketken joq.
Kelesi kezekte kongolyq fýtbolshylar tarazy basyn teńestirýge umtyldy. Nátıjesinde 45-mınýtta Ioan Vıssa óz quramasynyń dop dodasyndaǵy alǵashqy golyn soqty.
Osylaısha quramalar 1.1 esebine qanaǵat bildirdi.
Aıta keteıik, 2026 jylǵy fýtboldan álem chempıonaty tarıhta alǵash ret birden úsh elde — AQSh, Kanada jáne Meksıkada ótedi. Týrnır matchtary 11 maýsym men 19 shilde aralyǵynda 16 qalada uıymdastyrylady.
Sondaı-aq bul FIFA tarıhyndaǵy eń aýqymdy álem chempıonaty bolmaq. Óıtkeni alǵash ret toptyq kezeńde 48 ulttyq qurama baq synaıdy.
Eske salsaq, budan buryn Kılıan Mbappeniń qos goly álem chempıonatynda Frantsııaǵa jeńis syılady.
