Ronaldo «Valıadolıd» klýbynyń prezıdenti atandy
ASTANA. QazAqparat - Brazılııalyq tanymal fýtbolshy Ronaldo Ispanııanyń «Valıadolıd» klýbyna basshy boldy, dep habarlaıdy «QazAqparat» HAA klýbtyń Týıtterdegi resmı paraqshasyna silteme jasap.
Lýıs Nazarıo da Lıma klýb aktsııalarynyń baqylaýshy paketin, ıaǵnı 51%-yn 30 mıllıon eýroǵa satyp alyp, resmı túrde klýbtyń ıesi atandy.
«Biz jańa menedjment kezeńin bastaǵaly otyrmyz. Ol básekege tózimdilik, jarııalylyq, revolıýtsııa jáne áleýmettik ustanymdaryn basshylyqqa alady. Jankúıerlerdiń klýbty jaqsartýǵa qosar úlesiniń artýyn qalaımyn, olardan syn pikirler men usynystardy qabyldaýǵa ázirmin. Birge básekege tózimdi komanda quramyz», - dedi Ronaldo arnaıy uıymdastyrylǵan sharada.
2001 jyldan beri klýb prezıdenti bolyp kelgen Karlos Sýares 2011 jyldan bastap klýb aktsııalarynyń basym bóligine ıelik etken bolatyn.
Aıta keteıik, «Valıadolıd» birneshe jyl boıy Ispanııanyń birinshi jáne ekinshi lıgasynda júrdi. 2014 jyly Ispanııa chempıonatynda 19-orynmen shektelip, Segýndaǵa (ekinshi lıga) ketken. Tórt jyldyq úzilisten soń, osy maýsymda La Lıgaǵa oraldy. 3-týrdan keıin komanda eki upaımen 16-orynda tur.
