Ronald Reıganǵa qastandyq jasaǵan adam bostandyqqa shyqty
ASTANA. QazAqparat - 1981 jyly AQSh prezıdenti Ronald Reıganǵa qastandyq jasaǵan 61 jastaǵy amerıkalyq Djon Hınklı Vashıngtondaǵy psıhıatrııalyq emhanadan bosatylyp Ýılıamsbýrg qalasyndaǵy (shtat Vırdjınııa) úıine keldi, dep habarlaıdy Reuters agenttigi.
Federaldyq sýdıa shilde aıynda Hınklı qoǵamǵa qaýip keltirmeıdi dep sheship, onyń úıine qaıtýyna úkim shyǵarǵan.
Alaıda Hınklıge suhbat berýge, arnaıy ruqsatsyz áleýmettik jelige tirkelýine bolmaıdy. Ǵalamtorǵa kirýge múmkindigi bolsa da oǵan ózi jasaǵan qylmysy týraly aqparat izdeýge tyıym salynǵan. Sonymen qatar, oǵan ishimdik ishýge, bireý ertip júrmese qaladan 48,2 kılometr alysqa uzaýyna quqyǵy joq.
Hınklı 1981 jyly 30 naýryzda Vashıngtondaǵy «Hılton» qonaqúıiniń janynda Reıgandy atqan. Alty oqtyń biri rıkoshetpen prezıdent keýdesine tıgen.
Sotta Hınklıge 13 aıyp taǵylyp, aqyrynda ol aqyl-esi durys emes dep tanylǵan.
