Romýald Vadanı Benın prezıdenti qyzmetine kiristi
ASTANA. KAZINFORM – Romýald Vadanı Benındegi prezıdent saılaýynda 94 paıyzdan astam daýys jınap, el prezıdenti bolyp saılandy, dep habarlaıdy Agenzia Nova agenttigi.
Benınniń burynǵy Ekonomıka jáne qarjy mınıstri Romýald Vadanı prezıdent saılaýynda 94,05 paıyz daýys alyp, jeńiske jetti.
Onyń jalǵyz qarsylasy – burynǵy mádenıet mınıstri Pol Hýnkpe 5,95 paıyz daýys jınady. Komıssııa málimetinshe, saılaýǵa qatysý kórsetkishi 58,75 paıyz bolǵan.
Vadanıdi qyzmetinen ketip jatqan prezıdent Patrıs Talon, sondaı-aq prezıdenttik lagerdegi «Jańarý jolyndaǵy progressıvti odaq» jáne «Respýblıkalyq blok» partııalary qoldady.
Eldegi basty oppozıtsııalyq kúsh – Demokrattar partııasy qajetti qoldaýdyń bolmaýyna baılanysty óz kandıdatyn usyna almady. Sonymen qatar partııa saılaý dodasyna qatysýshylardyń eshqaısyn qoldamaıtynyn málimdedi.
Daýys berý barysynda saılaýshylar belsendiligi tómen boldy, ásirese Kotoný jáne Porto-Novo sııaqty iri qalalarda halyqtyń qatysýy az tirkeldi.
Buǵan deıin qańtar aıyndaǵy parlament saılaýynda da tómen qatysý kórsetkishi baıqalǵan edi. Ol kezde saılaý ýchaskelerine saılaýshylardyń 36 paıyzdan sál astamy ǵana kelgen.
Ortalyq saılaý komıssııasynyń tóraǵasy Sakka Lafııa daýys berý protsesin «beıbit jaǵdaıda ótti» dep baǵalady.
Sonymen qatar Benınniń azamattyq qoǵam uıymdary qurǵan baqylaýshylar platformasy shamamen 100-ge jýyq quqyqbuzýshylyq tirkelgenin habarlady. Olardyń qatarynda saılaý ýchaskeleriniń merziminen buryn ashylýy jáne daýys berý bastalmaı turyp jáshikterdiń bıýlletendermen toltyrylýy sekildi jaǵdaılar bar.
Ótken jyldyń qarashasynda júrgizilgen saılaý reformasynan keıin Benın prezıdentiniń ókilettik merzimi bes jyldan jeti jylǵa uzartyldy. Osylaısha Romýald Vadanı memleket basshysy qyzmetin 2033 jylǵa deıin atqarady.
Eske sala ketsek, byltyr Benınde memlekettik tóńkeris bolǵan edi. Kóp uzamaı el bıligi memlekettik tóńkeris jasaý áreketiniń jolyn kesti.
