Roman Jaılaýov Azııa boks keńesiniń chempıony atandy

Ol 12 raýndtyq jekpe-jekte óz otandasy Qanat Qartenbaevty upaı sanymen utty. Roman buǵan deıin 9 kezdesý ótkizip bárin (jeteýin nokaýtpen) óz paıdasyna sheshse, Qanat 17 kezdesýdiń 10-ynda utyp, beseýinde utylyp, ekeýinde teń túsken bolatyn. 90,7 aýyr salmaqtaǵy ózbekstandyq Elıor Gýlamov men reseılik Maksım Maslov arasyndaǵy kelesi bir tıtýldyq jekpe-jekte M.Maslov Azııa boks keńesiniń chempıony atandy. Maksım buǵan deıin 13 kezdesýiniń 11-inde utyp, bireýinde teń túsip, bireýinde jeńilis tapsa, Elıor 10 kezdeksýiniń 8-inde jeńip, bir ret teń túsip, bir ret jeńilistiń aşy dámin tatqan eken. Al reıtıngtik ózge jekpe-jekterde 12 raýndyq kezdesýde 63,5 keli salmaqtaǵy Meıirbek Sabırov 4-raýndta ózbekstandyq Bekzot Nabıevke tehnıkalyq nokaýtpen utyldy. Buǵan deıin Meıirbek 7 kezdesýdiń beseýinde utylyp, ekeýinde ǵana jeńiske jetse, Bekzot 27 kezdesýdiń 21-in jeńip, beseýinde utylyp, bireýinde teń túsken bolatyn. Qazaqstandyq Jandos Jetpisbaev pen Farhad Ospanov arasyndaǵy 10 raýndyq kezdesýde Jandos kásipqoı bokstaǵy 7-jeńisine qol jetkizdi. Bul týrnırde kásipqoı bokstaǵy alǵashqy saıysyn ótkizgen 76,2 keli salmaqtaǵy Qanat Ábdirahmanov pen Ánýar Marabaevtyń arasyndaǵy 4 raýndyq kezdesý Ánýardyń paıdasyna sheshildi.