Roman Starchenko «Barys» sapynda on jetinshi maýsymyn ótkizedi

ASTANA. KAZINFORM - Qazaqstandyq hokkeıshi Roman Starchenko «Barys» hokkeı klýby sapynda taǵy bir jyl oıyn kórsetedi.

Qazaqstandyq hokkeı ańyzy elordalyq klýb sapynda óziniń on jetinshi maýsymyn ótkizedi. Ol Qurlyqtyq hokkeı lıgasy tarıhynda bir klýbtyń quramynda eń kóp match ótkizgen oıynshy retinde erekshelenedi. Ol «Barys» quramynda 810 kezdesýde muzaıdynǵa shyqty. Sondaı-aq, ol KHL-da 800 match mejesinen asqan sanaýly hokkeıshiniń biri bolyp otyr. Hokkeıshi komanda quramynda 211 shaıba soqqan.

Kelisimshart 2026 jyldyń 31 mamyryna deıin bir maýsymǵa eseptelgen.

Ótken maýsymda Roman Starchenko 27 oıynda 12 (4+8) upaı enshiledi.

Qazaqstandyq klýb Qurlyqtyq hokkeı lıgasyndaǵy jańa maýsymda alǵashqy úsh oıyndy elordada ótkizedi. Aldymen 7 qyrkúıekte Reseıdiń «Traktor» (Chelıabınsk) komandasymen kezdesse, odan keıin 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.

Bıyl «Barys» Qurlyqtyq hokkeı lıgasynda sátsiz oıyn kórsetti. Shyǵys konferentsııasynda 12 oryn alyp, 68 oıynnan keıin nebári 35 upaı jınady.

Jańa maýsymǵa oqý-jattyǵý jıynynyń negizgi bóligi Astana qalasynda ótip jatyr. Aldymen medıtsınalyq komıssııa tekserýinen keıin ekijaqty kelisimshartqa qol qoıǵan hokkeıshiler 15 shildeden bastap daıyndyqqa kiristi.

Eske salsaq, bıyl «Barys» hokkeı klýbynyń tizginin Mıhaıl Kravets ustady.