Roman Sklıardyń tóraǵalyǵymen Investıtsııalar tartý jónindegi keńestiń kezekti otyrysy ótti
ASTANA. KAZINFORM – QR Premer-mınıstriniń birinshi orynbasary Roman Sklıardyń tóraǵalyǵymen Investıtsııalar tartý jónindegi keńestiń kezekti otyrysy ótti. Bul týraly QR Úkimeti málim etti.
Investıtsııalyq shtab otyrysynda Negizgi kásiporyndardy jańǵyrtýǵa, jańa jumys oryndaryn qurýǵa jáne ınnovatsııalyq óndiristerdi damytýǵa baǵyttalǵan ınvestıtsııalar týraly kelisimderdiń negizgi talaptary qaralyp, maquldandy.
«Qarmet» AQ-men Investıtsııalar týraly kelisim maquldandy. «Qarmet» AQ. 2024 jyly kompanııa óziniń ınvestıtsııalyq mindettemelerin oryndaý sheńberinde joǵary qaıta bólý klasterlerin qurý úshin zaýytty jańǵyrtýǵa jáne ınfraqurylymdy damytýǵa $1,3 mlrd ınvestıtsııalady. Bul rette, uzaq merzimdi strategııa sheńberinde kásiporyn 2028 jyldyń sońyna deıin ınvestıtsııalyq jobalardy iske asyrýǵa $3,5 mlrd baǵyttaýdy josparlap otyr. «Qarmet» AQ zaýytyn jańǵyrtý óńirdiń áleýmettik-ekonomıkalyq damýyndaǵy mańyzdy qadam bolmaq.
Sonymen qatar Soltústik Qazaqstan oblysynda «Ultradecor Trading Kazakhstan» JShS baǵdarlanǵan jońqa jáne lamınattalǵan aǵash-jońqa taqtalaryn shyǵaratyn zaýyt salý boıynsha ınvestıtsııalar týraly kelisim jasasý maquldandy. Jobany iske asyrý óńdeý ónerkásibin damytýdyń mýltıplıkatıvtik áserin týdyrady jáne ekonomıkaǵa shamamen 82 mlrd teńge ınvestıtsııa ákeledi.
Sondaı-aq Túrkistan oblysyndaǵy Ógem ózeninde sý elektr stansalary kaskady bar sý qubyryn salý jobasy maquldandy. Jobaǵa salynǵan ınvestıtsııalardyń jalpy kólemi shamamen 190 mlrd teńgeni quraıdy. Jobanyń maqsaty – Túrkistan oblysynyń 1 mln-ǵa jýyq turǵynyn sapaly aýyz sýmen qamtamasyz etý. Joba sonymen qatar óńirdegi elektr energııasynyń tapshylyǵyn jabýǵa, sanıtarlyq-gıgıenalyq jaǵdaılardy jáne jergilikti halyqtyń jalpy ómir súrý sapasyn jaqsartýǵa baǵyttalǵan.
Bul bastamalar zamanaýı tehnologııalardy engizýge, joǵary aqy tólenetin jumys oryndaryn qurýǵa jáne el ekonomıkasynyń básekege qabilettiligin arttyrýǵa baǵyttalǵan Qazaqstannyń ónerkásiptik áleýetiniń senimdi damýyn kórsetedi.