Roman Sklıar: Jyl saıyn 6000 kópbalaly ana baspanaly bolady

NUR-SULTAN. QazAqparat - El aldynda selektorlyq rejimde esep berip jatqan QR ındýstrııa jáne ınfraqurylymdyq damý mınıstri Roman Sklıar kópbalalardy analardy baspanamen qamtý josparymen bólisti, dep habarlaıdy QazAqparat tilshisi.

Onyń aıtýynsha, qazirgi tańda Qazaqstan aýmaǵynda 31 myń kópbalaly jáne turmysy tómen otbasy baspana kezeginde tur.

«Elbasynyń bul baǵytta bergen naqty tapsyrmasy bar. Sol tapsyrmaǵa sáıkes 7 jylda 42 000 arendalyq páter salynbaq. Bıyldan bastap jyl saıyn 6 myń páter berilip otyrady. Sáýir aıynda zańnamaǵa ózgeris engizdik. Bul baǵyttaǵy jumystar jalǵasady. Budan bólek «Turǵynúıqurylysjınaqbanki» AQ arqyly jeńildetilgen nesıemen ıpoteka berý kózdelgen. Bıýdjetten bul maqsatqa da jyl saıyn qarjy bólinedi. Jergilikti ákimdik tizimi boıynsha 10 paıyz alǵashqy jarnamen 20 jylǵa 2 paıyzdyq ıpoteka beriledi. Osylaısha, ary ketse 6 jyldyń ishinde barlyq kópbalaly jáne turmysy tómen otbasylardy túgeldeı baspanamen qamtyp bitiremiz», - dedi Roman Sklıar.

Mınıstrdiń aıtýynsha, atalmysh sanattaǵy januıalar memleket usynǵan eki joldyń qaısysyn tańdaıtynyn ózderi sheshpek.

«Kópbalaly otbasylardyń tabysy kóbeıip ketse, páterdi memleket qaıtaryp ala ma» degen sııaqty saýaldar kóp qoıylady. Bul arendalyq baspanada qalaǵandaryńyzsha turýǵa bolady. Tek basqa páter satyp alǵan jaǵdaıda ǵana memleketke qaıtarýǵa mindetti bolasyzdar», - dedi Roman Sklıar.