Roman Sklıar jumys saparymen Aqtóbe oblysyna bardy
Roman Sklıar «Jumyspen qamtýdyń jol kartasy» baǵdarlamasynyń óńirde júzege asyrylýymen, jergilikti mańyzy bar joldardyń qurylys barysymen tanysty.
Oblys basshylyǵy avtojol qurylysy boıynsha sharalar jáne aldaǵy kezeńge arnalǵan josparlar týraly baıandady.
Aǵymdaǵy jyly qabyldanǵan sharalar aıasynda óńirde 800 km jol salý jáne jóndeý josparlanǵan.
Jumyspen qamtý jol kartasy sheńberinde 302 joba iske asyrylýda. Bul maqsatqa 46 mlrd teńgeden astam qarjy bólindi. 12 myńǵa jýyq jumys ornyn qurý josparlanýda.
Úkimet delegatsııasy 110 páterli «Batys-2» shaǵynaýdanyndaǵy turǵyn úı kesheniniń qurylys barysymen tanysty. Munda mektepke deıingi mekemelerdi, saýda núktelerin, balalardyń shyǵarmashylyǵyn damytý ortalyǵyn salý qarastyrylǵan.
Roman Sklıar sondaı-aq uzyndyǵy 696 metr bolatyn Selmash aýdanyndaǵy kópirdi aralap kórdi. Munda qurylys-montajdaý jumystary 2018 jyly bastalǵan, 2020 jyldyń sońynda aıaqtalatyn bolady.
Budan basqa, sapar barysynda «Aqtóbe – Atyraý – RF shekarasy (Astrahan)» respýblıkalyq mańyzy bar avtomobıl jolynyń 100-160 km, 160-220 km, 236-275 km, 275-330 km qurylys barysy tekserildi. Keńes barysynda «Todini Costruzioni Generali S.p.A» jáne «Uniserv» JUS, «SPIK Akkord» AAQ merdigerlik uıymdarynyń jáne ınjenerlik qyzmetterdiń basshylary jol jumystarynyń barysy týraly aqparat berdi.
Jumys saparynyń qorytyndysy boıynsha Roman Sklıar qoıylǵan mindetterdi júzege asyrýdyń mańyzdylyǵyn atap ótti jáne belgilengen josparlardy oryndaý boıynsha birqatar naqty tapsyrmalar berdi.
