Roman Sklıar jaıly mekteptiń ashylý saltanatyna qatysty
ASTANA. KAZINFORM – Memleket basshysynyń tapsyrmasymen jańa oqý jylynda elimizde «Jaıly mektep» aýqymdy ulttyq jobasy aıasynda salynǵan alǵashqy mektepter ashyldy, dep habarlaıdy Úkimettiń baspasóz qyzmeti.
Premer-Mınıstrdiń birinshi orynbasary Roman Sklıar Astana qalasyndaǵy №99 mekteptiń ashylý saltatanatyna qatysty. Alǵashqy qońyraý saltanatynda sóz sóılegen vıtse-premer oqýshylardy Bilim kúnimen quttyqtady.
«Barshańyzdy búgingi erekshe mereke – Bilim kúnimen shyn júrekten quttyqtaımyn! Mektep bul bilim ordasy, osy jerde Sizderge sapaly bilim jáne sanaly tárbıe alý úshin barlyq qolaıly jaǵdaı jasalyp otyr. Mektepte sáýletine saı sapaly tárbıe men bilim beriledi dep senemiz. Ol úshin mektep basshylary men pedagogter ujymy barlyq kúsh-jigerin jumsaıtyny anyq», — dep atap ótti Premer-Mınıstrdiń birinshi orynbasary.
Esterińizge sala keteıik, «Jaıly mektep» ulttyq jobasy Memleket basshysynyń bastamasymen júzege asyrylyp otyr. Oqýshy orny tapshylyǵy máselesin sheshýge jáne qala men aýyl mektepteri arasyndaǵy alshaqtyqty azaıtýǵa baǵyttalǵan jobada fýnktsıonaldy jáne qaýipsiz bilim berý ortasyn qurýǵa erekshe nazar aýdarylady. Bastaýysh jáne joǵarǵy synyp oqýshylary úshin bólek bloktar qarastyrylǵan. Sondaı-aq tehnıkalyq quraldar engizý arqyly qaýipsizdik sharalaryn arttyrý, erekshe bilim berýdi qajet etetin balalar úshin kedergisiz orta qalyptastyrý, mektepti zamanaýı pándik kabınettermen jabdyqtaý talap etiledi.
Tamara Dúısenova Astanadaǵy jaıly mekteptiń ashylý saltanatyna qatysqanyn jazǵan bolatynbyz.
