Roman Sklıar taýarlyq sút fermalaryn qoldaýǵa qatysty túsinik berdi
«Taýarlyq sút fermalaryn (TSF) salý, memlekettik qoldaýdy júzege asyrýǵa qatysty toqtalyp óteıin. 2020 jyldyń qorytyndysy boıynsha jalpy mal basy 16,8 myń bas iri qara mal jáne óndiristik qýaty jylyna 102,6 myń tonna sút bolatyn 49 ónerkásiptik ári otbasylyq TSF paıdalanýǵa berildi. Onyń ishinde jalpy mal basy 13,6 myń bas iri qara mal jáne óndiristik qýaty jylyna 92,4 myń tonna sút bolatyn 19 ónerkásiptik taýarlyq sút fermasy bar», - delingen Úkimet basshysy orynbasarynyń depýtattar saýalyna bergen jaýabynda .
Onyń aıtýynsha, pandemııa jaǵdaıynda Úkimet TSF ashý jáne jańǵyrtý úshin bar kúshin saldy. Mysaly, asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalary aıasynda ımporttalǵan asyl tuqymdy analyq mal basyn satyp alý úshin sýbsıdııalaý normatıvteri bir basqa 225-ten 400 myń teńgege deıin, otandyq mal basyn – 150-den 200 myń teńgege deıin ulǵaıtyldy. Sondaı-aq, súttiń qunyn arzandatý úshin óndirilgen ónimniń bir kelisi úshin sýbsıdııalaý normatıvi endi 20-dan 45 teńgege deıin qubylady. Buǵan deıin fermer bir keli sút úshin 10-35 teńge qoldaýǵa úmittene alatyn.
«Qazirgi zamanǵy TSF ashýdy yntalandyrý úshin ótken jyly tehnıka men jabdyqtardy satyp alýǵa, sondaı-aq qurylys-montajdaý jumystaryna jumsalǵan shyǵyndardyń 25%-yn óteý engizildi. Budan basqa, 6% syıaqy mólsherlemesimen jáne 10 jylǵa deıingi merzimmen ónerkásiptik taýarlyq sút fermalarynyń qurylysyn jeńildikpen qarjylandyrý iske asyrylýda», - dep atalyp ótken R. Sklıar jaýabynda.
Budan buryn habarlanǵandaı, Májilistiń jalpy otyrysynda depýtat Amanǵalı Berdalın elimizdiń klımat ereksheligine beıimdelgen otandyq asyl tuqymdy mal sapasyn arttyrý máselesin kóterip, depýtattyq saýalyn Premer-Mınıstrdiń orynbasary Roman Sklıarǵa joldady.
