Roman Sklıar: «Sukhoi Superjet 100» ushaqtary turaqty reısterde paıdalanylmaıdy
NUR-SULTAN. QazAqparat - QR Indýstrııa jáne ınfraqurylymdyq damý mınıstri Roman Sklıar Reseıde apatqa ushyryǵan «Sukhoi Superjet 100» ushaqtarynyń Qazaqstanda paıdalanylýyna qatysty túsinik berdi, dep habarlaıdy QazAqparat tilshisi.
«Bizde Reseıde óndirilgen «SSJ-100» markaly bir ǵana bıznes ushaq paıdalanylyp júr. Bul ushaq jekemenshik kompanııaǵa tirkelgen. Al turaqty baǵdarlarda bizde osy tıptegi áýe kemesi paıdalanylyp júrgen joq», - dedi mınıstr tilshilerdiń saýalyna jaýap bere otyryp.
Sonymen qatar mınıstr Sheremetevodaǵy ushaq apatyna qatysty vedomstvo atynan RF Kólik mınıstrligindegi áriptesterine kóńil aıtý jedelhaty baǵyttalǵalǵanyn aıtty.
«Avıatsııada barlyq reglamentter men qaýipsizdik talaptaryn mindetti túrde oryndaý kerek. Bul negizgi basymdyq bolyp sanalady», - dedi R. Sklıar.
Mınıstr árbir ushaqty tekserýdiń reglamenti bar ekenin, bul tekseristi óndirýshi zaýyt, áýe kompanııasy jáne azamattyq avıatsııa ınspektory iske asyratynyn atap ótti.
«Bul normalar bizde oryndalyp jatyr jáne ony IKAO komıssııasy da rastady», - dedi Roman Sklıar.
