Roman Sklıar: Sý tasqynyna baılanysty jaǵdaı erekshe baqylaýda
NUR-SULTAN. QazAqparat – Úkimet basshysynyń orynbasary Roman Sklıar kóktemgi sý tasqynyna baılanysty jaǵdaı erekshe baqylaýda turǵanyn málimdedi, dep habarlaıdy QazAqparat tilshisi.
«Sý tasqynyna baılanysty táýekelder erekshe baqylaýda tur. Biz barlyq problemalyq máseleni osy jyldyń 12 aqpanynda tótenshe jaǵdaılardyń aldyn alý jáne joıý jónindegi vedomstvoaralyq komıssııanyń otyrysynda anyqtap, qarastyrdyq. Hattamaǵa qol qoıyldy. Múddeli ortalyq jáne jergilikti atqarýshy organdar tıisti tapsyrmalardy oryndap jatyr. Іshki ister mınıstrligine elge sý tasqynyna qarsy sharalardyń oryndalýyn úılestirý jáne baqylaý júkteldi», - dedi Roman Sklıar Úkimet otyrysynda.
Úkimet basshysynyń orynbasary óz sózinde atap ótkendeı, sonymen qatar ortalyq memlekettik organdar men oblystyq ákimdikter bar problemany qysqa merzimde sheshýi tıis.
«Biz sý tasqyny jaǵdaıyn qadaǵalap, apta saıyn selektorlyq rejimde máseleni baqylaýda ustaımyz», - dedi ol.
Eske sala ketsek, búgingi Úkimet otyrysynda Іshki ister mınıstri Erlan Turǵymbaev sý basý qaýpi joǵary óńirlerdi atap, tótenshe jaǵdaılardyń týyndaý qaýpin azaıtý boıynsha is-sharalar josparymen bólisken edi. Óz kezeginde Premer-Mınıstr Asqar Mamın sý tasqynynyń aldyn alý boıynsha mınıstrlikter men ákimdikterge birqatar naqty tapsyrma berdi.
