Roman Sklıar sý dıplomatııasyn kúsheıtýdi tapsyrdy
ASTANA. QazAqparat – Ekologııalyq qaýipsizdik máselelerin sheshýde keshendi tásilderdi qoldaný kerek. Bul týraly QR Premer-Mınıstriniń birinshi orynbasary Roman Sklıar aıtty, dep habarlaıdy QazAqparat tilshisi.
«Ekologııalyq qaýipsizdik ult densaýlyǵynyń basty kepilderiniń biri. Ony sheshýde keshendi tásilderdi qoldaný kerek. Oǵan el basshylyǵy úlken kóńil bólýde. 2021 jyly jańa Ekologııalyq kodeks qabyldandy. Óńirlerde ekologııalyq jaǵdaıdy jaqsartý boıynsha jol kartalary bekitildi. Degenmen, kásiporyndarda qoljetimdi uzaq tehnologııalardy paıdalanýǵa kóshý jumysyn kúsheıtý qajet. El ekonomıkasyn tereń kómirteksizdendirý maqsatynda Úkimet 2060 jylǵa deıingi kómirtegi beıtaraptyǵy strategııasynyń jobasyn ázirledi. Degenmen, elimizdiń ekonomıkalyq jaǵdaıyn eskere otyryp, alǵa qoıylǵan mindetterdi kezeń-kezeńimen oryndaý qajet. Sonymen qatar tarıhı lastaný oryndaryn, onyń ishinde Qoshqar ata qaldyq qoımasyn joıý boıynsha bastalǵan jumystardy der ýaqytynda aıaqtaý kerek. Osy rette mınıstrlikke Mańǵystaý oblysynyń ákimdigimen qoımany joıý jumystaryn jedeldetýdi tapsyramyn», - dedi Roman Sklıar Ekologııa jáne tabıǵı resýrstar mınıstrliginiń keńeıtilgen alqa májilisinde.
Onyń atap ótýinshe, halyq arasynda ekologııalyq mádenıet qalyptastyrý da mańyzdy. Bul rette úkimettik emes uıymdarmen jumysty kúsheıtip, múddeli taraptarmen is-qımyldy jandandyrý qajet.
«Jumysty kelesi aspektisi - sý saıasatyn júzege asyrý. Klımattyń jáne kórshiles memleketterdi sýdy paıdalanýdaǵy ózgerister sý dıplomatııasyn kúsheıtýdi ári sý resýrstaryn tıimdi paıdalanýdy arttyrýdy talap etedi. Ózbek tarapymen transshekaralyq sý nysandaryn birlesip basqarý jáne paıdalaný jónindegi úkimetaralyq kelisim jobasynyń ashyq qalǵan tarmaqtaryn kelisýdi jedeldetý kerek», - dedi birinshi vıtse-premer.
