Roman Sklıar SQO-daǵy sý tasqynynan zardap shekken turǵyndarmen kezdesti
ASTANA. KAZINFORM - Birinshi vıtse-premer Roman Sklıar Soltústik Qazaqstan oblysyndaǵy Esil aýdanyna qarasty Pokrovka, Petrovka jáne Nıkolaevka aýyldarynda sý basqan úılerdi aralap, zardap shekken turǵyndarmen kezdesti. Bul týraly Úkimettiń baspasóz qyzmeti habarlady.
Premer-Mınıstrdiń birinshi orynbasarymen ótken kezdesýde aýyl turǵyndary sý basqan úılerden jergilikti ákimdik, polıtsııa jáne qutqarýshylardyń kúshimen erte kóshirilgenderin aıtty. Aýyl turǵyndary 2017 jylǵy sý tasqyny kezinde úılerine sý kirmegenin, al bıyl sý tasqynynan aıtarlyqtaı shyǵyn kelgenin aıtty.
Roman Sklıar qazirgi sý tasqyny aımaq tarıhynda buryn-sońdy bolmaǵanyn rastady.
«Bul meteorologııalyq baqylaýlardyń tarıhynda eshqashan bolǵan emes. Prezıdent eshkimniń qoldaýsyz qalmaıtynyn basa aıtty. Árbir otbasy, árbir adam, árbir azamat mańyzdy. Barlyǵy ótemaqy alady. Úıdi jóndeý nemese qalpyna keltirý múmkin bolmasa, jańa úıler salamyz. Eshkim nazarsyz, kómeksiz qalmaıtynyna senimdi bolýyńyz kerek», - dedi ol.
Óz kezeginde SQO ákimi Ǵaýez Nurmuhambetov aýyl turǵyndaryn sý tartylǵan kezde zardap shekkenderdiń úılerin tekserý úshin arnaıy komıssııa jumys isteıtinin, osy kezeńde quqyq qorǵaý organdary tártip pen úılerdi talan-tarajdan qorǵaýdy qamtamasyz etetinine sendirdi.
Sondaı-aq Roman Sklıar Pokrovka jáne Nıkolaevka aýyldaryndaǵy eki evakýatsııalaý pýnktin tekserip, Qyzyljar aýdany Novonıkolskoe aýylyndaǵy kópirge baryp, sý tasqyny kezeńinde jolaýshylar kóliginiń qaýipsiz ótýin tekserdi.
