Roman Sklıar sıngapýrlyq kompanııa ókilderimen Pavlodar oblysynda ónerkásip parkiniń qurylysyn talqylady
ASTANA. KAZINFORM – Qazaqstan Premer-mınıstriniń birinshi orynbasary Roman Sklıar XINFA GROUP basqarma tóraǵasynyń orynbasary Chjao Tınıýnmen Qazaqstan aýmaǵynda qazirgi zamanǵy ónerkásiptik park qurylysynyń ınvestıtsııalyq ózara is-qımyl jáne praktıkalyq aspektileri máseleleri boıynsha kezdesý ótkizdi. Bul týraly Úkimettiń baspasóz qyzmeti habarlady.
XINFA GROUP – sıngapýrlyq kompanııa, energetıka, alıýmınıı jáne hımııa ónerkásibi, sondaı-aq ekologııalyq qurylys jáne agrarlyq tehnologııalar salasynda ártaraptandyrylǵan portfeli bar álemdegi eń iri ındýstrııalyq holdıngterdiń biri. Kompanııa 1972 jyly qurylǵan jáne birneshe negizgi óndiristik baǵyttar boıynsha jahandyq kóshbasshylyq pozıtsııalarǵa ıe.
Pavlodar oblysynda tolyq tsıkldi aýqymdy ónerkásiptik park qurý jónindegi ınvestıtsııalyq jobanyń tujyrymdamasy kómirden, boksıtterden, mystan, flıýorıtten jáne áktastan joǵary qaıta bólý ónimderin shyǵarý maqsatynda shıkizatty tereń óńdeýdi kózdeıdi. Atap aıtqanda, alıýmınıı, alıýmınıı jáne mys óndirý boıynsha metallýrgııa óndiristerin salý, jańartylatyn energııa kózderi bazasyndaǵy nysandardy qosa alǵanda, energetıkalyq ınfraqurylymdy qalyptastyrý, sondaı-aq soda, kómirtekti materıaldar jáne ekologııalyq qurylys sheshimderi óndiretin kásiporyndardy iske qosý josparlanyp otyr. Investıtsııalardyń jıyntyq kólemi shamamen $15 mlrd deńgeıinde baǵalanady, bolashaq ındýstrııalyq parktiń aýdany – 3 myń gektardan astam.
Xinfa Group basqarma tóraǵasynyń orynbasary Chjao Tınıýn kompanııa boksıt, kómir jáne mys ken oryndaryn qosa alǵanda, Qazaqstannyń resýrstyq bazasyna aldyn ala taldaý júrgizgenin jáne tereń óńdeý tizbegin qalyptastyrý men qosylǵan quny joǵary ónim shyǵarý kontekstinde olardyń ónerkásiptik áleýetin oń baǵalaıtynyn atap ótti.
Roman Sklıar Qazaqstan Prezıdent Qasym-Jomart Toqaevtyń baǵytyna súıene otyryp, ónerkásiptik jańǵyrtýdy, strategııalyq ınvestıtsııalardy tartýdy jáne tehnologııalyq ındýstrııany damytýdy memlekettik ekonomıkalyq saıasattyń negizgi basymdyqtary retinde qarastyratynyn atap ótti. Úkimet halyqaralyq ındýstrııalyq toptarmen uzaqmerzimdi áriptestik tetikterin qosa alǵanda, iri ınvestıtsııalyq jobalardy súıemeldeý úshin ornyqty quqyqtyq jáne ınstıtýtsıonaldyq baza qalyptastyrdy.
Kezdesý qorytyndysy boıynsha jobany odan ári egjeı-tegjeıli pysyqtaýǵa, ındýstrııalyq áriptestikti keńeıtýge jáne uzaqmerzimdi ınvestıtsııalyq yntymaqtastyqty nyǵaıtýǵa múddelilik rastaldy.
Aıta keteıik, Aqtóbede 41,9 mlrd teńgege alkogolsiz sýsyndar shyǵaratyn zaýyt salynady.