Roman Sklıar Shymkentti damytý baǵytyndaǵy jumystarmen tanysty

ShYMKENT. QazAqparat – QR Premer-Mınıstriniń orynbasary Roman Sklıar Shymkent qalasyna jumys saparymen keldi. Úkimet basshysynyń orynbasary Tuńǵysh Prezıdent – Elbasy Nursultan Nazarbaevtyń jáne Memleket basshysy Qasym-Jomart Toqaevtyń Shymkent qalasyn damytý jónindegi tapsyrmalarynyń oryndalý barysymen tanysty, dep habarlaıdy QazAqparat tilshisi.

Úkimet basshysynyń orynbasary ótkizý qabileti saǵatyna 2000 jolaýshyny quraıtyn Shymkent qalasy áýejaıynyń jańa termınalynyń qurylysyn aralap kórip shyqty. Búginde joba boıynsha qurylys-montajdaý jumystarynyń alǵashqy kezeńi aıaqtaldy. Al, ekinshi kezeńniń qurylys jumystaryn «Alıans Kontrakt Qurylys» JShS júzege asyrady. 115 jumysshy men 10-ǵa jýyq arnaıy tehnıka tartylǵan qurylys jumystary eki aýysymda júrgizilýde. Jańa termınaldyń qurylysyn osy jyldyń qazan aıynda aıaqtaý kózdelgen. Vıtse-premer odan ári toqtap turǵan burynǵy «Melanj» AQ-nyń toqyma fabrıkasynyń jáne «ıÝteks» AQ tigin fabrıkasyn iske qaıta qosý barysyndaǵy atqarylyp jatqan jumystarymen tanysty.

Aıta keteıik, bul kásiporyndardyń múlik menshigi búginde «Qazaqstannyń ınvestıtsııalyq qory» AQ-na ótken. Qala ákimi Erlan Aıtahanovtyń aıtýynsha, jol kartasynyń júzege asyrylýy, toqyma kásiporyndarynyń qaıta iske qosylýy úshinshi megapolıs úshin óte mańyzdy sanalady. Búginde ákimdik tarapynan óndiristi iske qosýǵa jáne kásipkerlikke meılinshe qoldaý kórsetilip, ınfraqurylymyn qalpyna keltirý (elektrmen jabdyqtaý, sýmen jabdyqtaý jáne sý burý júıelerine qosý) jumystary qarqyndy júrýde. Bul óz kezeginde Qazaqstanda óńdeletin maqta kóleminiń 2 esege ósýin qamtamasyz etip, 800 adam jumyspen qamtıdy.