Roman Sklıar «Shevron» korporatsııasy Eýrazııa bólimshesiniń basqarýshy dırektorymen kezdesti
ASTANA. KAZINFORM – QR Premer-mınıstriniń birinshi orynbasary Roman Sklıar «Shevron» korporatsııasy Eýrazııa bólimshesiniń basqarýshy dırektory Derek Magness myrzamen kezdesý ótkizdi. Oǵan QR Energetıka mınıstri Erlan Aqkenjenov jáne «QazMunaıGaz» UK» AQ basqarma tóraǵasy Ashat Hasenov qatysty.
Úkimettiń baspasóz qyzmeti habarlaǵandaı, kezdesý barysynda taraptar munaı-gaz salasyndaǵy ekijaqty yntymaqtastyqtyń qazirgi jaǵdaıy men keleshegin talqylady.
Kelissóz kezinde Qazaqstan-Amerıka energetıkalyq seriktestiginiń flagmany sanalatyn Teńiz jobasyna erekshe nazar aýdaryldy.
Óz kezeginde Derek Magness Qazaqstandaǵy ınvestıtsııalyq ahýaldyń arqasynda Teńiz jobasy boıynsha mańyzdy óndiristik kórsetkishterge qol jetkizilgenin atap ótti. «Shevron» ókili retteýshi ortanyń boljamdylyǵyn jáne memlekettik organdarmen konstrýktıvti is-qımyldy erekshe atap ótip, bul uzaqmerzimdi ınvestıtsııalar úshin qolaıly jaǵdaı jasaıtynyn jetkizdi.
Sonymen qatar Roman Sklıar Teńiz kenishinde oryn alǵan jáne óndiristiń ýaqytsha toqtap qalýyna ákep soqtyrǵan oqıǵalarǵa baılanysty alańdaýshylyq bildirdi.
«Shevron» kompanııasynyń basshylyǵy oqıǵalardyń saldaryn joıý jáne munaı óndirýdi kezeń-kezeńimen arttyrý boıynsha qabyldanǵan sharalar týraly habardar etti. Sondaı-aq kompanııa basshylyǵy bolashaqta mundaı jaǵdaılarǵa jol bermeý jáne nysandardyń senimdi ári qaýipsiz jumysyn qamtamasyz etý boıynsha naqty is-qımyldar jasalatynyna senim bildirdi.
Budan bólek, geologııalyq barlaý jumystaryn damytý máseleleri talqylandy. «Shevron» kompanııasy birqatar geologııalyq barlaý jobasyna qyzyǵýshylyq tanytatynyn málimdedi.
Kezdesý sońynda taraptar uzaqmerzimdi jáne ózara tıimdi yntymaqtastyqty odan ary damytýǵa beıildilikterin, sondaı-aq ózara is-qımyldyń barlyq baǵyty boıynsha syndarly dıalogke daıyn ekendikterin jetkizdi.
Eske salsaq, Energetıka mınıstri Erlan Aqkenjenov elimizdiń munaı ken oryndarynan alynatyn ónimdi bólý týraly kelisimsharttardy qaıta qaraý máselesi qandaı kezeńde turǵanyn aıtty.