Roman Sklıar Petropavldyń strategııalyq nysanyn qorǵaýǵa tapsyrma berdi
ASTANA. KAZINFORM – «Ýaqyt tapshy»: birinshi vıtse-premer Roman Sklıar Petropavldyń strategııalyq nysany – «Kyzyljar Sý» seriktestigin qorǵaýǵa tapsyrma berdi
Sý tasqynyna qarsy jumys aıasynda Qazaqstan Respýblıkasy Premer-Mınıstriniń birinshi orynbasary Roman Sklıar Soltústik Qazaqstan oblysynyń ákimi Ǵaýez Nurmuhambetovpen birge Teplıchnoe aýyly men Kojevennyı kentiniń bógetterin, «Qyzyljar Sý» JShS-niń 1-shi jáne 2-shi sorǵy stantsııalaryn tekserdi.
Tekserý barysynda Roman Sklıar qazirgi sý tasqyny jaǵdaıyn eskere otyryp, qoldanystaǵy bógetterdi nyǵaıtý, olardy ulǵaıtý jumystarynyń jáne arnaıy tehnıka men topyraq toltyrylǵan qapshyqtarmen qamtamasyz etý mańyzyn atap ótti.
Qazir oblys ortalyǵynyń turǵyndaryn aýyz sýmen qamtamasyz etip otyrǵan «Qyzyljar Sý» JShS-niń sorǵy stantsııalaryn sý tasqynynan qorǵaý maqsatynda ınjenerlik jumystar júrgizilýde. Jumys qarqyny joǵary jáne sý tasqyny jaǵdaıyna baılanysty rettelip otyr.
Petropavl sý torabyn aralaý barysynda Premer-Mınıstrdiń birinshi orynbasary sýdyń kelýine az ýaqyt qalǵanyn atap ótti.
«Búgin sý basý qaýpi bar aımaqtardy aralaý barysynda jedel sheshýdi qajet etetin birqatar másele qaraldy. Bul, eń aldymen, sý tasqynyna qarsy is-sharalardy júrgizý úshin tehnıka sanyn kóbeıtý jáne bógetterdi kúsheıtý. Biz ınfraqurylymdy jáne eldi mekenderdi qorǵaý týraly aıtyp otyrmyz. Úlken sýdyń kelýine 7-8 kún qaldy. Qazir Sergeev sý qoımasynda 3 metrden astam sý tasyp jatyr. Tolyp ketý boıynsha antırekord ornatylady dep kútilýde, ol shamamen 4 metrdi quramaq. 2017 jylǵa qaraǵanda áldeqaıda kóp sý keledi. Sondyqtan qazir barlyq kúsh pen resýrsty osy máselelerdi sheshýge baǵyttaý qajet. Oǵan qosa búginde barlyq jol-qurylys kompanııasy ýchaskelerdegi jumysyn ýaqytsha toqtatyp, turǵyndarmen sý tasqynyna qarsy is-sharalardy júrgizetin bolamyz», — dedi Roman Sklıar.
