Roman Sklıar Nur-Sultan - Pavlodar tas jolynyń qurylys barysymen tanysty

«Qazavtojol» UK» AQ basshylyǵy mınıstrdi jumys barysymen tanystyrdy. Avtobannyń tolyǵymen paıdalanýǵa berilýi úshin joldyń birneshe ýchaskesinde qurylys jumystaryn aıaqtaý kerek. Roman Sklıar merdigerlerden trassa qurylysyn tez arada aıaqtaýdy talap etti. - Jumystardy aıaqtaıtyn naqty merzimdi belgileńizder, - dedi Roman Sklıar. - Bul joldyń qurylysyn tez arada aıaqtaý kerek. Jumystardy atqarý grafıgin qaıta qaraýdy buıyramyn. Oblys ákimi Bolat Baqaýov, óz kezeginde, merdiger uıym ókilderine qurylys jumystaryn neǵurylym erte támamdaý qajettiligin eskertti. - Kún jyly, ári uzaq bolǵan kezde belsenip qalý kerek, - deıdi Bolat Baqaýov. - Eger jumystar qazan-qarasha aılaryna deıin jalǵasyp ketse, aýa temperatýrasy 0 gradýstan túsip ketedi. Sol ýaqytta kúni-túni jumys isteýge májbúr bolasyzdar.

QR Indýstrııa jáne ınnovatsııalyq damý mınıstri qurylys jumystarynyń sapalylyǵy boıynsha jaýapkershilik, túptep kelgende, tapsyrys berýshi, ıaǵnı mınıstrliktiń moınynda qalatynyna erekshe nazar aýdardy. Sonymen birge, Roman Sklıar el tas joldaryndaǵy shekten tys júk tasymalyn boldyrmaýdyń mańyzdyǵyn qadap aıtty. - Pavlodar oblysynda shekten tys júk tasymalyn boldyrmaý boıynsha baqylaýdy kúsheıtý jumystary pılottyq rejimde júzege asyrylýda, - deıdi Roman Sklıar. - 2017 jyldan 2018 jylǵa deıin oblystyq kóliktik ınspektsııa aıyppuldar men tekserister sanyn 3,5 ese arttyrǵan. Bir kúni bizder 47 tonna qıyrshyq tas artyp kele jatqan qytaılyq júk mashınasyn toqtattyq. Budan keıin joldarymyzdan ne qalatynyn ózderińiz ańǵara berińiz. Aıta keteıik, bıyl oblystyq jáne aýdandyq mańyzdaǵy joldardy jóndeýdiń barlyq túrlerine 200 mıllıard teńge bólindi. Nátıjesinde respýblıka boıynsha 10 myń shaqyrym avtojoldar jóndeýden ótkizilmek.