Roman Sklıar nemis kompanııalarynyń basshylarymen onlaın-kezdesý ótkizdi

NUR-SULTAN. QazAqparat - Qazaqstan Respýblıkasy Premer-Mınıstriniń orynbasary Roman Sklıar jetekshi nemis kompanııalarynyń basshylarymen kezdesý ótkizdi, dep habarlaıdy QazAqparat Úkimettiń baspasóz qyzmetine silteme jasap.

Onlaın-kezdesýdiń taqyryby mamandardy daıyndaý men olardyń biliktiligin arttyrý, kásiptik oqytý salasyndaǵy nemis ýnıversıtetterimen jáne joǵary tehnologııalyq kompanııalarmen birlesken jobalardy júzege asyrý boldy.

Kezdesýge «Knauf International GmbH», «Henkel AG & Co. KGaA», «Kuehne+Nagel (LLC)», «RRL Rail & Road Logistics GmbH», «Fichtner GmbH & Co. KG», «Festo Didactic SE», «Herrenknecht AG», «Infineon Technologies AG» sııaqty 30-dan astam nemis jetekshi kompanııalary, sonymen qatar bilim berý, oqytý jáne qaıta daıarlaý uıymdarynyń basshylary qatysty.

Roman Sklıar óz sózinde Qazaqstan men Germanııanyń kásiptik oqytý men biliktilikti arttyrý salasyndaǵy yntymaqtastyq tájirıbesi bar ekenin jáne kóptegen nemis kompanııalary qazaqstandyq ekonomıkaǵa jumysshylar daıarlaýda qoldaý kórsetetinin atap ótti.

Olardyń arasynda Knauf, Heidelberg Cement, WILO bar. Keıbir kásiporyndarda mamandardy daıyndaıtyn oqý ortalyqtary bar. Taraptar osy baǵyttaǵy yntymaqtastyqty nyǵaıtýǵa kelisti, bul qazaqstandyq jas mamandarǵa kásibı mamandarmen ózara árekettesý, tájirıbesin alýǵa jáne bolashaq mansaptyń negizin qalaýǵa múmkindik beredi. Qazaqstandyq taraptan kezdesýge kompanııalar men múddeli memlekettik organdardyń basshylary da qatysty.