Roman Sklıar men Jeńis Qasymbek Qaraǵandy oblysyndaǵy ınvestıtsııalyq jobalardyń iske asyrylý barysymen tanysty

QARAǴANDY. QazAqparat - QR Premer-Mınıstriniń orynbasary Roman Sklıar men Qaraǵandy oblysynyń ákimi Jeńis Qasymbek Qaraǵandy oblysyndaǵy jol qurylysy barysymen jáne iri ınvestıtsııalyq jobalardyń iske asyrylýymen tanysty, dep habarlaıdy QazAqparat primeminister.kz-ke silteme jasap.

Roman Sklıar Qaraǵandy-Temirtaý avtomobıl jolynyń ýchaskesin qarap shyqty. Merdigerler jóndeý jumystaryn bir aı ishinde aıaqtaýǵa ýáde berdi. Jol alty jolaqty bolady. Kún saıyn osy jol arqyly 20 myńnan astam avtokólik ótedi. Vıtse-premerge Qaraǵandydaǵy jańa joldar týraly baıandaldy. Bıyl jalpy uzyndyǵy 48,3 km quraıtyn Soltústik jáne Shyǵys aınalma joldarynyń qurylysyn aıaqtaý josparlanǵan.

Qaraǵandyda Roman Sklıar 3-JEO-nyń M-10 jylý magıstralin qaıta jańartý barysymen tanysty. Jumys ótken jyly bastalyp, qazir aıaqtalýǵa jaqyn qaldy. Bul 60 myńǵa jýyq qaraǵandylyqty úzdiksiz jáne sapaly jylýmen qamtamasyz etýge múmkindik beredi.

Premer-Mınıstrdiń orynbasary Saran qalasyndaǵy «Kazcentrelectroprovod» JShS-de boldy. Kásiporyn kabel-ótkizgish, telekommýnıkatsııalyq jáne elektrotehnıkalyq ónimderdi, metall qurylymdaryn óndiredi, osy jyldyń bes aıynda óndiris kólemi 1,7 mlrd teńgeni qurady. Kabelderdi shyǵarý eki ese ósti. Qaraǵandylyq óndirýshi Qazaqstannyń qajettiligin qamtamasyz etýde. Onyń ónimderi aýyldardy tsıfrlandyrý kezinde qoldanylady. Kásiporyn sondaı-aq Reseı men Ózbekstan úshin eksportqa jumys isteıdi, ol qazirde Eýropa naryǵyna shyqty.

Sondaı-aq, Roman Sklıar Yutong markaly avtobýstar men arnaıy tehnıka óndirisine qarajat salatyn ınvestorlarmen kezdesti. Kásiporyn burynǵy RTI zaýytynyń bazasynda jumys isteıtin bolady. Qazir qurylystyń birinshi kezeńi bastaldy. Óndiristi iske qosý jáne alǵashqy avtobýstardy shyǵarý bıylǵy jyldyń jeltoqsan aıyna belgilengen. Zaýyttyń qýattylyǵy jylyna 1 200 avtobýs jáne 500 arnaıy tehnıka men arnaıy kólik shyǵarýdan turady. Jańadan 400 jumys orny qurylady.

Nysandy aralaý barysynda Roman Sklıar men Jeńis Qasymbek Avtobýstar óndirisi boıynsha ınvestıtsııalyq jobany iske asyrýdyń jol kartasyna qol qoıdy.

Sapar barysynda Qaraǵandy–Balqash avtojoly, uzyndyǵy 363 km bolatyn «Ortalyq – Ońtústik» dálizin qaıta jańartý barysy tekserildi. Jumys qyzý júrip jatyr. Sondaı-aq Roman Sklıar men Jeńis Qasymbek «Kúrti-Býrylbaıtal» ýchaskesiniń qaıta jańartylý jumystarymen tanysty. Mundaǵy jóndeý jumystaryn 2022 jyly aıaqtaý josparlanyp otyr.

Jumys saparynyń qorytyndysy boıynsha Roman Sklıar belgilengen josparlardy úzdiksiz ári ýaqytyly oryndaý boıynsha tapsyrmalar berdi.