Roman Sklıar men Marat Hýsnýllın Qazaqstan men Reseı ekijaqty yntymaqtastyq máselelerin talqylady
NUR-SULTAN. QazAqparat –Reseı Federatsııasy Premer-Mınıstriniń orynbasary Marat Hýsnýllınniń basshylyǵymen RF úkimettik delegatsııasy eki kúndik jumys saparymen Nur-Sultanǵa keldi, dep habarlaıdy QazAqparat QR Premer-Mınıstriniń baspasóz qyzmetine silteme jasap.
Sapardyń birinshi kúni Qazaqstan Respýblıkasy Premer-Mınıstriniń orynbasary Roman Sklıarmen kezdesý ótti, onda jol salasyndaǵy birlesken jobalar, ótkizý pýnktterin qaıta jańartý, Qazaqstan men Reseıdiń qurylys normalaryn birizdendirý máseleleri qaraldy.
Atap aıtqanda, taraptar jol ınfraqurylymyn damytý máselelerin talqylap, olardyń ótkizý qabilettiligin, júk tasymaly kólemi men áleýmettik-ekonomıkalyq áserin boljaýǵa múmkindik beretin avtomobıl joldarynyń qurylysy boıynsha jumystardy sınhrondaýǵa daıyn ekendikterin bildirdi. Óz kezeginde shekaralyq ótkizý beketterin birlesip qaıta qurý josparlary olardyń júktemesiniń ulǵaıýymen jáne eki el arasyndaǵy týrıstik aǵynnyń kólemin ulǵaıtý múmkindikterimen baılanysty.
Qabyldanǵan sheshimder múddeli memlekettik organdardyń jedel jáne úılestirilgen jumysyna, eki memleket azamattarynyń múddelerine baǵyttalǵan praktıkalyq nátıjelerge qol jetkizýge yqpal etedi.
Kezdesýge qatysýshylar ózara tıimdi ekonomıkalyq yntymaqtastyq prıntsıpterin ustanatyndyqtaryn rastady jáne úkimetaralyq baılanystardyń joǵary dınamıkasyn saqtaýǵa kelisti.
Reseılik delegatsııa quramynda úkimettiń apparat basshysynyń orynbasary E. Tagırov, kólik mınıstriniń birinshi orynbasary A. Kostıýk, «Reseı avtomobıl joldary» memlekettik korporatsııasynyń basqarma tóraǵasy V. Petýshenko boldy.
