Roman Sklıar qytaılyq kompanııanyń dırektorlar keńesi tóraǵasymen kezdesti

ASTANA. KAZINFORM – Premer-mınıstrdiń birinshi orynbasary Roman Sklıar Astanaǵa qytaılyq kompanııa delegatsııasyn bastap kelgen Qytaıdyń MCC International Engineering Group Co., Ltd kompanııasynyń dırektorlar keńesiniń tóraǵasy Chjý Sıaofeımen kezdesý ótkizdi.

Kezdesý barysynda taraptar taý-ken jáne metallýrgııa ónerkásibi salasyndaǵy yntymaqtastyqtyń keleshegin, sondaı-aq qytaılyq ınjınırıng kompanııasynyń Qazaqstan aýmaǵyndaǵy iri ındýstrııalyq jobalardy júzege asyrýǵa qatysý múmkindikterin talqylady.

Roman Sklıar MCCI kompanııasynyń jobalaýdan bastap jabdyqtardy jetkizýge, qurylys júrgizýge jáne obektilerdi paıdalanýǵa berýge deıingi jobalardy tolyq tsıklde júzege asyrýdaǵy eleýli halyqaralyq tájirıbesin atap ótti. Mundaı tájirıbe óndiristik qýattardy jańǵyrtý jáne shıkizat bazasyn damytý jaǵdaıynda qazaqstandyq ónerkásip kompanııalary úshin praktıkalyq turǵydan asa mańyzdy.

Kelissózder barysynda Atasý aýdanynda temir jáne marganets kenin óńdeıtin baıytý fabrıkasyn salý jobasyna erekshe nazar aýdaryldy. Qazaqstan tarapy bul jobany taý-ken salasyn damytýdyń jáne el ishinde qosylǵan qundy arttyrýdyń strategııalyq mańyzdy elementi retinde qarastyrady.

Roman Sklıar Qazaqstan Úkimetiniń jobany qajetti vedomstvoaralyq súıemeldeýdi qamtamasyz etýge jáne ony júzege asyrýǵa baılanysty máselelerdi jedel sheshýge járdemdesýge daıyn ekenin rastady.

Kezdesý qorytyndysy boıynsha taraptar MCC International Engineering Group kompanııasynyń jobany pysyqtaýǵa naqty qatysýy, birlesken jumys tobyn qurý jáne yntymaqtastyq parametrlerin aıqyndaıtyn jol kartasyn ázirleý merzimin kelisý jóninde ýaǵdalasty. Sondaı-aq perspektıvaly taý-ken baıytý jobalary boıynsha syndarly dıalogty jalǵastyrýǵa daıyn ekenderin rastady.

Buǵan deıin Qazaqstanda sheteldik ınvestorlar qandaı jańa zaýyttar salyp jatqanyn jazǵan edik.