Roman Sklıar: Kólik qurastyrý - el ekonomıkasynyń ósim draıverleriniń biri
NUR-SULTAN. QazAqparat - Kólik qurastyrý salasyndaǵy Qazaqstannyń iri kásiporyndary reseılik «Podolsk mashına jasaý zaýyty» AQ-men kelisimge qol qoıdy, dep habarlaıdy QazAqparat tilshisi.
Reseılik kompanııamen kelisimdi qazaqstandyq «Maker (Meıker)» JShS, «Petropavl aýyr mashına jasaý zaýyty» AQ jáne «Kazenergomash korporatsııasy» JShS jasasyp otyr. QR Indýstrııa jáne ınfraqurylymdyq damý mınıstrliginde ótken sharaǵa mınıstr Roman Sklıar, mınıstrlik ókilderi, «Podolsk mashına jasaý zaýytynyń» basqarma tóraǵasy Alekseı Rýbtsov, qol qoıýshy kásiporyn basshylary qatysty.
«Búgingi kelisim ıntegratsııalaý protsesin nyǵaıtýǵa óz úlesin qosatynyna, eki el kásiporyndary arasyndaǵy baılanysty tereńdetýge yqpal etetinine senimdimin. Búgin de kólik qurastyrý kesheni - Qazaqstan ekonomıkasynyń ósim draıverleriniń biri. Yntymaqtastyq ornatý maqsatynda Podolsk mashına jasaý zaýyty mamandarynyń qazaqstandyq kásiporyndarǵa irikteý júrgizgeni úshin alǵys aıtqym keledi», - dedi Roman Sklıar óz sózinde.
Mınıstrdiń aıtýynsha, eki el kásiporyndarynyń mundaı tyǵyz yntymaqtastyǵy «Podolsk mashına jasaý zaýytynyń» baı halyqaralyq tájirıbesine negizdele otyryp, otandyq jáne sheteldik elektr stantsııalaryn energetıkalyq jabdyqtarmen qamtamasyz etedi.
Qol qoıylǵan kelisimder eki el kásiporyndaryna generatsııalaýdyń, jańǵyrtýdyń jáne jumys istep turǵan nysandardy qaıta jańartýdyń jańa múmkindikterin ashpaq. Sondaı-aq, atalmysh kelisim jylý energetıkasy segmentterindegi jabdyqtar men jınaqtaýshy qosalqy bólshekterdi jetkizý, tájirıbe almasý, energetıkalyq jáne ózge de mashına jasaý jabdyqtaryn óndirý, birlesken ǵylymı-zertteý jáne tájirıbelik-konstrýktorlyq jumystardy júrgizýge jol ashpaq.
