Roman Sklıar Qyrǵyzstannan sur syzbamen kólik ákelinetindigin moıyndady

ASTANA. KAZINFORM — Premer-mınıstrdiń birinshi orynbasary Roman Sklıar Qyrǵyzstannan sur syzbamen elimizge kólikter ákelinetindigin moıyndady. 

Úkimet úıinde ótip jatqan baspasóz máslıhatynda BAQ ókilderi Roman Sklıardan «Qyrǵyzstannan kóleńkeli syzbamen áli kúnge deıin avtomobılder kirgizilip jatyr. Al Qazaqstan bıýdjeti keden salyqtarynan qaǵylyp otyr deýge bolady. Muny qashan toqtatasyzdar?» dep suraǵan edi.

— Iá, shynymen de mundaı problema bar. Ózderińizde bilesizder, burynyraqta Eýrazııalyq ekonomıkalyq odaqtyń 5 memleketi oǵan kirgende, tıisti shartqa qol qoıatyn kezde belgili túsinikke kelgen. Armenııa men Qyrǵyzstan ózderine keletin ımport avtomobılderge keden jáne basqa da salyqtardy belgileý barysynda belgili bir jeńildikter alǵan. Degenmen, Eýrazııalyq ekonomıkalyq odaq aıasynda bul qarym-qatynas ishki erejelermen rettelýi tıis. Eger Qazaqstanǵa kirgizilgen kólikter kedendik jáne basqa da tólemderdi tólemese, onda atalǵan kólikter shekarany kesip ótip, esepke alynatyn kezde ony óteýi qajet. 2022 jyldyń 1 qyrkúıegine deıin ákelingen kólikterdi zańdastyrýǵa baǵyttalǵan úlken naýqan ótkenin bilesizder. Sondyqtan bul másele kún tártibinen alynýy tıis edi. Alaıda, elimizge sur syzbamen kólik ákelýge tyrysatyndar áli de bar. Degenmen, arnaýly organdar, keden qyzmeti bul máselemen aınalysyp jatyr. Menińshe, olar bul isti tártipke keltiredi dep oılaımyn, — dedi Roman Sklıar. 

Aıta ketelik Roman Sklıar popýlısterdiń deregine súıenip, kez kelgen ekonomıka salasyn «parazıt» deýge bolmaıtynyn aıtqan edi.