Roman Sklıar: Qazaqstan Ortalyq Azııanyń basty kóliktik logıstıkalyq habyna aınaldy

ASTANA. KAZINFORM –  Óńdeýshi ónerkásip pen Qazaqstan ekonomıkasynyń turaqty ósýi úshin basty syn-qater teńizge shyǵatyn joldyń bolmaýy. Sonymen qatar, salany damytýdy yntalandyrý maqsatynda Úkimet belsendi jumys júrgizýde, sonyń arqasynda Qazaqstan Ortalyq Azııanyń basty kóliktik logıstıkalyq habyna aınaldy. Bul týraly Birinshi vıtse-premer Roman Sklıar Primeminister.kz saıtyna bergen suhbatynda aıtty. 

Onyń sózinshe, sońǵy 12 jylda kólik ınfraqurylymyn damytýǵa $32 mlrd astam qarajat jumsaldy. Myńdaǵan shaqyrymdyq avtomobıl jáne temirjol, teńiz porttary men áýe aılaqtary salyndy.

«Kólik — bul el ónerkásibi men ekonomıkasyna qyzmet kórsetýi tıis servıs túri. Bıyl qarqyndy qurylys jumystary bastalatyn «Baqty – Aıagóz» úshinshi temirjol ótkeli — Qytaı Halyq Respýblıkasyna shyǵaratyn joldardyń biri. 2019 jyly «Altynkól» temirjol shekara ótkeli men qurǵaq porttyń qýattylyǵy tek 25% paıdalanyldy, al «Dostyq» – 80-90%-ǵa jumys istedi.
Qazirgi ýaqytta bizde osy eki ótkel 100% júktememen jumys istep tur jáne úshinshisinde jumys bastaldy. Sondaı-aq qazirdiń ózinde biz júk tranzıti úshin ǵana emes, birinshi kezekte, óńdeý ónerkásibi úshin tórtinshi ótkeldi qurý týraly oılanyp jatyrmyz. Qazaqstannyń teńizge shyǵýǵa múmkindigi joq, alaıda kórshi memleketterde biz shyǵýǵa tıis úlken naryqtar bar. Bul qymbat, biraq soǵan turarlyq shyǵyndar», — dep málimdedi Roman Sklıar.