Roman Sklıar Qaraǵandy-Balqash avtojolyn rekonstrýktsııalaýdy bıyl aıaqtaýdy tapsyrdy
ASTANA. KAZINFORM — QR Premer-Mınıstriniń birinshi orynbasary Roman Sklıar Qaraǵandy oblysyna jumys sapary barysynda uzyndyǵy 363 km bolatyn «Qaraǵandy – Balqash» avtojolyn rekonstrýktsııalaý jumysy barysymen tanysty.
Qazirgi sátte merdiger kompanııa jol jabynynyń joǵarǵy qabatyn tósep jatyr.
«QazAvtoJol» UK» AQ Qaraǵandy oblystyq fılıalynyń dırektory Erlan Jumaǵulov avtojoldyń tutas boıynda aınalyp ótetin jer joq ekenin jáne kólik quraldary qozǵalysy qalypty jaǵdaıda júrip jatqanyn baıandady.
Jumabek, Aqsý, Aqshataý, Aqsý-Aıýly eldi mekenderi men Balqash qalasy úshin bes aınalma jol salyndy. Merdiger Balqash qalasynyń irgesindegi temirjol arqyly ótetin ótkel men jol aıryǵy qurylysyn aıaqtady.
Aýyl sharýashylyǵy tehnıkasynyń ótýi úshin 32 jol ótpesi jáne 11 kópir salyndy. Qoldanystaǵy ınjenerlik kommýnıkatsııa jelileri qaıtadan júrgizildi.
Avtojoldaǵy jumys kezeń-kezeńimen júzege asýda: tosqaýyl qorshaýlar ornatylyp, qardan qorǵaıtyn qorshaýlar men mal ótkizbeıtin qorshaýlar salyndy. Demalys alańdaryn jasaý boıynsha jumys júrgizilip jatyr. 18 demalys alańynyń ishinde modýldik úlgidegi 8 sanıtarlyq-gıgıenalyq torap bar. Aıaldap otyratyn arnaıy oryndar men avtokólikterdi jóndeýge arnalǵan estakadalar qarastyrylǵan.
Roman Sklıar «Qaraǵandy–Balqash» avtojolynyń «Ortalyq–Ońtústik» kólik dálizin damytý úshin mańyzy zor ekenin atap ótip, jol-qurylys jumystarynyń qarqynyn tómendetpeýdi jáne joldy rekonstrýtsııalaýdy jyl sońyna deıin aıaqtaýdy tapsyrdy.
Sondaı-aq jumys sapary barysynda birinshi vıtse-premer Balqash qalasynda jylytý maýsymyna daıyndyqty tekserdi. Ol jylý jelileri men qalalyq JEO-nyń qaıta jańartylatyn ýchaskelerimen tanysty.
2021 jyldan bastap qalada uzyndyǵy 10,6 km magıstraldyq jylý jelilerine rekonstrýktsııa júrgizilip jatyr. Jumysty bıyl aıaqtaý josparlanyp otyr, bul qaladaǵy jylýmen jabdyqtaý sapasyn jaqsartýǵa múmkindik beredi. Іshki magıstraldyq jáne oramishilik jylý jelilerin jańartý boıynsha jumys júrgizilýde. Barlyǵy 25 km jylý jelileri aýystyrylady.
Birinshi vıtse-premerge barlyq jumys ótken jylytý maýsymynda úzilis baıqalǵan jylý magıstraliniń osal ýchaskelerinde júrgizilip jatqany týraly habarlandy.
Balqash JEO-da Roman Sklıarǵa jańa, besinshi qazandyqtyń qurylysy jaıynda baıandaldy, ondaǵy montajdaý jumysy 2026 jyldyń sońyna deıin aıaqtalady dep josparlanýda.
Stansa jabdyqtaryn jóndep, jańǵyrtýǵa 2,6 mlrd teńge bólindi. Úsh qazandyq pen eki týrbınaǵa aǵymdaǵy jóndeý jumysy aıaqtaldy. Taǵy bir qazandyq pen týrbınany kúrdeli jóndeý josparlanyp otyr.
Jylytý maýsymynyń basynda JEO tórt qazandyqpen jumys isteıtin bolady, bul turǵyndardy turaqty jylýmen qamtamasyz etedi.
