Roman Sklıar Investshtabtyń kezekti otyrysyn ótkizdi
ASTANA. KAZINFORM — Úkimette Premer-mınıstrdiń birinshi orynbasary Roman Sklıardyń tóraǵalyǵymen Investıtsııalar tartý jónindegi keńestiń otyrysy ótti, onyń barysynda, sondaı-aq, agroónerkásiptik keshendegi ınvestıtsııalyq jobalardy júzege asyrý máseleleri de qaraldy. Bul týraly Úkimettiń baspasóz qyzmeti málim etti.
Máselen, agroónerkásiptik sektordaǵy eki joba boıynsha ınvestıtsııalar týraly kelisimderdiń negizgi sharttary maquldandy. Birinshi jobada Tiryaki Agro túrik kompanııasynyń qatysýymen astyqty tereń óńdeý kesheniniń qurylysy qarastyrylǵan. Onyń josparlanǵan óndiristik qýattylyǵy jylyna 250 myń tonna óńdelgen bıdaı men 80 myń tonna burshaqty quraıdy. Investıtsııalardyń jalpy kólemi — shamamen 160 mlrd teńge.
— Jıynda ekinshi jobanyń da sharttary bekitildi, ol — kelesi bir túrik kompanııasy YDA Group-tyń qatysýymen tyńaıtqyshtar men pestıtsıdter óndiretin agrohımııalyq keshen salý. Óndiris qýattylyǵy — jylyna 150 myń tonna, ınvestıtsııa kólemi — 168 mlrd teńge, — delingen habarlamada.
Eki joba da aýyl sharýashylyǵy shıkizatyn tereń óńdeýdi damytýǵa, azyq-túlik qaýipsizdigi deńgeıin arttyrýǵa, ımportty almastyrýǵa jáne qosylǵan quny joǵary ónim assortımentin keńeıtýge baǵyttalǵan.
Qazaqstanda astyq daıyndaýdyń jyl saıynǵy kólemi 16-17 mln tonna deńgeıinde ekenin jáne úshten bir bóligi eksportqa ketetinin eskere otyryp qolǵa alynǵan ónimniń 260 túrin qamtıtyn ishki óńdeýdi damytý bastamasy ekonomıkany ártaraptandyrý jáne agroónerkásiptik keshenniń ornyqty damýy úshin qosymsha múmkindikter ashady.
Sonymen qatar ınvestıtsııalyq shtab qolaıly ınvestıtsııalyq ahýaldy qalyptastyrý boıynsha júıeli jumystardy da jalǵastyrýda. Basty nazar normatıvtik bazany jetildirýge, ákimshilik kedergilerdi azaıtýǵa jáne ekonomıkanyń basym salalarynda ınvestıtsııalyq bastamalardy iske asyrý úshin turaqty jaǵdaılar qalyptastyrýǵa salynǵan.
Eske sala keteıik, buǵan deıin QR Premer-Mınıstriniń birinshi orynbasary Roman Sklıar Qazaqstannyń iri qalalaryna avtokólikterdiń kirýin shekteý ázirge josparlanyp otyrǵan joq ekenin aıtqan bolatyn.