Roman Sklıar Investıtsııa tartý jónindegi keńes otyrysyn ótkizdi
ASTANA. KAZINFORM — Búgin QR Premer-Mınıstriniń birinshi orynbasary Roman Sklıardyń tóraǵalyǵymen Investıtsııa tartý jónindegi keńestiń kezekti otyrysy ótti.
Jıynda «Kazakh Invest» UK» AQ-ǵa ınvestordyń is-qımyl barysy egjeı-tegjeıli jazylǵan jańa ádistemelik anyqtamalyq tanystyryldy. Árbir ortalyq memlekettik jáne jergilikti atqarýshy organ ınvestorlarmen jumys isteý kezinde osy nusqaýlyqty basshylyqqa alatyn bolady.
Buǵan qosa «Kazakh Invest» UK» AQ basqarma tóraǵasy Erjan Elekeev qazaq-qatar jumys tobynyń jobalaryn iske asyrý barysy týraly baıandady.
Qazaqstan men Qatar arasyndaǵy ekijaqty taýar aınalymynda oń dınamıka baıqalady, 2023 jylǵy ósim 50%-dy qurady. Búgingi tańda Qazaqstan men Qatar arasyndaǵy yntymaqtastyq sheńberinde jalpy quny $18 mlrd-tan asatyn 15 jobany qamtıtyn ınvestıtsııalyq pýl qalyptastyryldy.
Sonymen qatar Memleket basshysynyń tapsyrmasyn oryndaý sheńberinde árqaısysy ilespe kásiporyndardyń tutas klasterin qurýǵa baǵyttalǵan 17 aýqymdy basym joba tizbesi ázirlendi. Atalǵan tizbeni qarastyrý barysynda týrızm jáne azyq-túlik ónerkásibi salasyndaǵy jobalar týraly aqparat tyńdaldy.
Sondaı-aq ınvestıtsııalyq jobalardyń birqatar ózekti máseleleri qaraldy, olar boıynsha hattamalyq sheshimder tıisti memlekettik organdarǵa oryndaýǵa jiberildi.