Roman Sklıar halyqqa kerekti taýarlardy óndirýge bólinetin sýbsıdııa sharttaryn atady
ASTANA. QazAqparat - QR Indýstrııa jáne ınfraqurylymdyq damý mınıstri Roman Sklıar ımportty azaıtý úshin halyqqa kerekti taýarlardy óndirýde Ulttyq bankten iri jobalarmen birge shaǵyn jáne orta kásipkerliktiń sýbektilerin de qoldaýdy surady, dep habarlaıdy QazAqparat tilshisi.
Eske sala ketsek, OKQ-daǵy búgingi baspasóz máslıhatta «Atameken» UKP basqarma tóraǵasy Abylaı Myrzahmetov Qazaqstanǵa keletin ımporttyq taýarlardyń kólemin azaıtý baǵytynda qandaı sharalar qolǵa alynyp jatqanyn aıtyp bergen edi.
Onyń sózinshe, Memleket basshysynyń tapsyrmasymen halyqqa kerekti qarapaıym taýarlardy óndirý úshin 600 mlrd teńge bólingeli otyr.
Baspasóz máslıhatynda Roman Sklıar hosy maqsatta bólinetin sýbsıdııalardyń sharttaryn atady.
«Qaryz alýshylar úshin «Bıznestiń jol kartasy - 2020» baǵdarlamasy aıasynda stavkalardy sýbsıdııalaý esebinen nomınaldy syıaqy mólsherlemesi 8 paıyzdy quraıdy. Qaryz merzimi - 7 jyl. Buǵan qosa 600 mlrd teńgeniń 100 mlrd teńgesi shaǵyn jáne orta kásipkerlik sýbektilerin qarjylandyrýǵa baǵyttalady», - deıdi Roman Sklıar
Mınıstrdiń aıtýyna qaraǵanda, «qarapaıym zattar ekonomıkasyna» jatatyn salalarda negizinen shaǵyn jáne orta kásipkerlik sýbektileri shoǵyrlanǵan. Olardyń óndiristik qýaty tek jartylaı jumys isteýde.
«Osyǵan baılanysty jedel óndiristi júrgizip, ishki naryqqa taýarlardy tezirek shyǵarý úshin qaryzǵa beriletin qarajattyń 50 paıyzy ınvestıtsııalyq maqsatqa, al qalǵan 50 paıyzy aınalymdaǵy qarajatty toltyrý úshin berilgeli otyr. Bul baǵyttaǵy qadamdar óndiristik qýatty tolyqqandy deńgeıge shyǵarýǵa serpin beredi. Osyǵan oraı Ulttyq bankten iri jobalarmen birge shaǵyn jáne orta kásipkerliktiń sýbektilerin qoldaýdy suraımyz», - deıdi mınıstr.
Eske sala ketsek, buǵan deıin QR Premer-Mınıstri Asqar Mamın otandyq taýarlardyń kólemin ulǵaıtýǵa qatysty negizgi mindetterdi ataǵan bolatyn.
Úkimet basshysynyń aıtýynsha, jeti jyldan keıin ımporttyń úlesi 59 protsentten 37-ge deıin túsedi. Esesine otandyq taýarlardyń kólemi artady. Osyǵan baılanysty óńdeýshi kásiporyndary ártaraptandyrý sharalary jalǵasady.
