Roman Sklıar GFR mınıstrimen saýda-ekonomıkalyq yntymaqtastyqty keńeıtý máselelerin talqylady
ASTANA. KAZINFORM — QR Premer-mınıstriniń birinshi orynbasary Roman Sklıar Germanııa Federatıvtik Respýblıkasynyń Ekonomıka jáne energetıka mınıstri Katerına Raıhemen onlaın kezdesý ótkizdi. Bul týraly QR Premer-mınıstriniń resmı aqparattyq resýrsy habarlady.
Taraptar ónerkásip, energetıka, saýda, kólik, logıstıka, aýyl sharýashylyǵy jáne eki el úshin basqa da basym baǵyttar boıynsha saýda-ekonomıkalyq yntymaqtastyqty odan ári keńeıtý máselelerin talqylady.
Roman Sklıar qazirgi tańda Qazaqstan men Germanııa arasynda «shıkizat, ónerkásip jáne tehnologııalar» formýlasy boıynsha tıimdi kooperatsııa júrgizýge múmkindik beretin negizdemelik sharttar men ınstıtýtsıonaldyq tetikterdiń keshendi arhıtektýrasy qalyptasqanyn atap ótti. Bul eki tarap úshin de «win-win» nátıjelerine qol jetkizýge jol ashady.
Óz kezeginde Katerına Raıhe Qazaqstanmen energetıka jáne resýrstar salasyndaǵy yntymaqtastyq Germanııa ekonomıkasy úshin eń qajet baǵyttardyń biri ekenin jetkizdi.
Kezdesý sońynda taraptar ekijaqty ekonomıkalyq baılanystardyń barlyq spektri boıynsha kooperatsııany nyǵaıtýǵa daıyn ekendikterin bildirdi.
Sonymen qatar taraptar 24 qyrkúıekte ótetin Qazaqstan-Germanııa Saýda-ekonomıkalyq yntymaqtastyq jónindegi úkimetaralyq jumys toby 15-otyrysynyń kún tártibin talqylady.
Kelissózder qorytyndysy boıynsha QR Premer-mınıstriniń birinshi orynbasary Roman Sklıar Germanııa Federatıvtik Respýblıkasynyń ekonomıka jáne energetıka mınıstri Katerına Raıheni Astanaǵa saparmen kelýge shaqyrdy.
Eske salaıyq, Roman Sklıar Astanada salynyp jatqan Ulttyq sport ýnıversıtetiniń qurylysymen tanysty.