Roman Sklıar GFR-dyń QR-daǵy Tótenshe jáne Ókiletti Elshisi Tılo Klınnermen kezdesti
NUR-SULTAN. QazAqparat – Roman Sklıar GFR-dyń QR-daǵy Tótenshe jáne Ókiletti Elshisi Tılo Klınnermen kezdesti, dep habarlaıdy QazAqparat primeminister.kz -ke silteme jasap.
Elshimen kezdesý barysynda ekijaqty ózara is-qımyldyń negizgi aspektileri, nemis ınvestorlarymen ınvestıtsııalar salasyndaǵy yntymaqtastyqty nyǵaıtý jónindegi jumys tobynyń qyzmeti, sondaı-aq eki eldiń dıplomatııalyq qarym-qatynastaryn odan ári nyǵaıtý perspektıvalary talqylandy.
Osylaısha, Tılo Klınnermen áńgimelesý barysynda Premer-Mınıstrdiń orynbasary Roman Sklıar búginde Germanııa Federatıvtik Respýblıkasy Qazaqstannyń halyqaralyq arenadaǵy eń mańyzdy seriktesteriniń biri ekendigin, al eki el arasyndaǵy qarym-qatynas kóptegen jyldar boıy dostyq pen ózara túsinistik rýhynda qalyptasyp kele jatqandyǵyn atap ótti.
Qazaqstandyq tarap eki eldiń ınvestıtsııalyq ózara qarym–qatynastaryn nyǵaıtý maqsatynda jańa tehnologııalar men ınnovatsııalar salasynda tanylǵan kóshbasshy nemis kompanııalaryn tsıfrlyq tehnologııalardy qoldana otyryp qurylatyn jańa óndiristerdi damytýǵa tartý, sondaı-aq Indýstrııa 4.0 elementterin engizý basymdyqqa ıe baǵyttar ekenin atap ótti. Bul rette nemis kásipkerlerine jan-jaqty qoldaý kórsetiledi.
Taraptar qarym-qatynastardy damytýdyń oń baǵytyn odan ári saqtaýǵa jáne olardy ekonomıkalyq, saıası, sondaı-aq áleýmettik salalarda odan ári nyǵaıtý jóninde barlyq kúsh-jigerin salýǵa kelisti.
