Roman Sklıar GFR Býndestag delegatsııasymen kezdesti

ASTANA. QazAqparat - QR Premer-Mınıstriniń birinshi orynbasary Roman Sklıar «Germanııa – Ortalyq Azııa» parlamenttik tobynyń tóraǵasy Oıgen Shmıdt basqaratyn GFR Býndestag delegatsııasymen kezdesti. Bul týraly QazAqparat Úkimettiń saıtyna silteme jasap habarlaıdy.

Sonymen qatar talqylaýǵa depýtattar Tomas Baraıss, Krıstıan Gorke, Krıstıan Shraıder, GFR-diń Qazaqstandaǵy elshisi Monıka Iversen qatysty.

Áńgime barysynda taraptar qazaq-nemis saýda-ınvestıtsııalyq ózara is-qımylynyń basym baǵyttaryn damytý máselelerin talqylady, «jasyl» ekonomıka jáne energetıka salasyndaǵy perspektıvaly jobalar boıynsha pikir almasty.

Qazaqstan men Germanııa arasyndaǵy tyǵyz saıası dıalogty atap ótken R. Sklıar ekijaqty taýar aınalymynyń ósip kele jatqanyna jáne bizdiń elimizge tartylǵan tikeleı nemis ınvestıtsııalarynyń ulǵaıyp jatqanyna nazar aýdardy.

Óz kezeginde depýtattar QR Úkimeti janyndaǵy Nemis bıznesimen ınvestıtsııalyq yntymaqtastyqty damytý jónindegi arnaıy jumys tobynyń qyzmetin joǵary baǵalady jáne GFR Býndestagynyń salalyq komıtetteriniń jelisi boıynsha ózara is-qımyldy nyǵaıtýǵa úles qosýǵa daıyn ekenderin bildirdi.

Foto: ukimet.kz