Roman Sklıar Germanııanyń bıznesi ókilderimen veb-konferentsııa ótkizdi
NUR-SULTAN. QazAqparat - QR Premer-Mınıstriniń orynbasary Roman Sklıardyń tóraǵalyǵymen 50-den astam nemis kompanııasy basshylarynyń qatysqan beınekonferentsııa ótti, dep habarlaıdy QazAqparat primeminister.kz silteme jasap.
Іs-sharaǵa eki eldiń elshileri, German ekonomıkasy Shyǵys komıtetiniń basqarýshy dırektory M. Harms, Ortalyq Azııadaǵy german ekonomıkasy ókildiginiń basshysy H. Voskanıan jáne QR salalyq mınıstrlikteri basshylarynyń orynbasarlary qatysty.
Roman Sklıar COVID-19 pandemııasyna baılanysty týyndaǵan qıyndyqtarǵa qaramastan, seriktestik qarym-qatynastardy saqtaǵany úshin bıznesmenderge alǵysyn bildirip, ózara tıimdi yntymaqtastyqty odan ári damytýǵa senim bildirdi jáne Qazaqstan tarapynyń ınvestorlarǵa tolyq qoldaý kórsetýge daıyn ekenin jetkizdi.
«Biz Prezıdentimiz Qasym-Jomart Kemeluly Toqaev pen Germanııanyń Federaldyq kantsleri Angela Merkel hanymnyń deńgeıinde 2019 jyly qol jetkizilgen barlyq ýaǵdalastyqtardyń, sondaı-aq 2020 jyldyń basynda qazaqstandyq delegatsııanyń Germanııaǵa resmı saparlary barysynda qol jetkizilgen barlyq kelisimderdiń tolyq is júzine asatynyna senemiz», - dep atap ótti Roman Sklıar bıznesmendermen áńgimelesý barysynda.
Syrtqy ister mınıstriniń orynbasary A. Aıdarov jalpy quny $3,7 mlrd bolatyn 51 birlesken ınvestıtsııalyq jobanyń oryndalý barysy týraly baıandady.
Óz kezeginde german bıznesiniń ókilderi koronavırýs pandemııasyna qaramastan, ınvestıtsııalaýdy jalǵastyrýdyń jáne Qazaqstanmen ekonomıkalyq baılanystardy saqtaýdyń mańyzdylyǵyn atap ótti, sondaı-aq ınvestıtsııalyq jobalardy qoldaýdyń teńdessiz sharalaryn negizge ala otyryp, kún tártibinde turǵan birlesken ózekti jobalardy aıaqtaýǵa senim bildirdi. Taraptar buǵan deıin qol jetkizilgen ýaǵdalastyqtardy tolyǵymen qoldaıdy jáne ınvestıtsııalyq yntymaqtastyqty odan ári damyta bermek.
