Roman Sklıar «Gazprom» JAQ basqarma tóraǵasy Alekseı Mıllermen kezdesti

ASTANA. KAZINFORM – Shyǵys ekonomıkalyq forýmy aıasynda Qazaqstan Premer-mınıstriniń birinshi orynbasary Roman Sklıar «Gazprom» JAQ basqarma tóraǵasy Alekseı Mıllermen kezdesý ótkizdi. Bul týraly Úkimettiń baspasóz qyzmeti habarlady.

Taraptar gaz salasyndaǵy ekijaqty yntymaqtastyqtyń aǵymdaǵy jaı-kúıi men perspektıvalaryn, sonyń ishinde gazdy jetkizý, tranzıt jáne qaıta óńdeý, sondaı-aq ınfraqurylymdyq ózara is-qımyldy keńeıtý máselelerin talqylady.

Taraptardyń uzaqmerzimdi ózara qarym-qatynasy negizinde energetıkalyq qaýipsizdikti arttyrý máselelerine erekshe nazar aýdaryldy.

Roman Sklıar «Gazprom» JAQ-pen seriktestiktiń strategııalyq sıpatyn atap ótip, Ortalyq Azııa men Eýrazııalyq keńistiktiń energetıkalyq naryqtaryn turaqty damytý úshin kúsh-jigerdi úndestirýdiń mańyzdylyǵyna toqtaldy.

Óz kezeginde «Gazprom» JAQ basshysy Reseı tarapynyń yntymaqtastyqty odan ári nyǵaıtýǵa múddeliligin bildirdi.

Kezdesý qorytyndysy boıynsha taraptar ózara tıimdi jobalardy damytý jónindegi jumysty jalǵastyrýǵa jáne turaqty dıalogty qoldaýǵa kelisti.

Aıta keteıik, qytaılyq oıynshyq óndirýshi Labubu-dyń naryqtaǵy quny «Gazpromnan» asyp tústi.