Roman Sklıar Frantsııada ótken birlesken ınvestıtsııalyq forýmǵa qatysty
«Frantsııanyń iskerlik ortalarynyń 150-den astam ókili qatysqan mańyzdy halyqaralyq is-sharanyń barysynda Qazaqstan-Frantsııa seriktestigin memlekettik deńgeıde ǵana emes, eki eldiń iskerlik ortalary men azamattarynyń yntymaqtastyǵyn keńeıtý áleýeti talqylandy. Forýmǵa qatysýshylar Qazaqstannyń ınvestıtsııalyq múmkindikterin, birlesken jobalardy iske asyrý perspektıvalaryn talqylap, elimizdiń ınvestıtsııalyq ahýalyna baǵa berdi», - delingen habarlamada.
Premer-Mınıstrdiń orynbasary atap ótkendeı, qazirgi tańda Qazaqstan-Frantsııa qatynastaryn «strategııalyq seriktestik» retinde sıpattaýǵa bolady. Ol dostyq pen ózara qoldaý dástúrlerine súıengen tıimdi jáne ózara tolyqtyratyn yntymaqtastyqtyń úlgisi. Máselen, búgingi kúnde keń sharttyq-quqyqtyq baza qurylǵan, onda 2008 jyly qol qoıylǵan Strategııalyq seriktestik týraly shart erekshe oryn alady.
Budan ózge, Qazaqstan frantsýz bıznesi úshin Ortalyq Azııa óńirindegi senimdi seriktes bolyp tabylady. Qazaqstan Eýropa elderiniń óńirdegi ekonomıkalyq múddeleriniń taratýshysy bola alady. Mashına jasaý, jer qoınaýyn paıdalaný, munaı óńdeý, energııa únemdeý, kóliktik-logıstıkalyq ınfraqurylymdy damytý, farmatsevtıka jáne basqa da salalarda ózara tıimdi yntymaqtastyqtyń dástúrli tájirıbesi qalyptasty.
Forýmǵa qatysýshylar atap ótkendeı, frantsýz kompanııalary Qazaqstanǵa kapıtal salý máselesine joǵary qyzyǵýshylyq tanytýda. Bul – Eýrazııa kontınenti elderin baılanystyratyn strategııalyq dáliz. Frantsýz iskerlik ortalarynyń ókilderi bergen baǵaǵa sáıkes, Qazaqstan Frantsııanyń Ortalyq Azııadaǵy senimdi seriktesi, eki el arasynda ózara tıimdi yntymaqtastyq tájirıbesi qalyptasqan.
Investıtsııalyq forým barysynda AirLiquideKarabatanTechGases jáne KazakhstanPetrochemicalIndustries (KPI) arasynda tehnıkalyq gazdy jetkizýge uzaq merzimdi kelisimshartqa qol qoıyldy. Kelisimshart «Ulttyq ındýstrııalyq munaı-hımııa tehnoparki» AEA aýmaǵynda qurǵaq syǵylǵan aýa men azotty óndiretin qondyrǵynyń qurylysyn jáne ony Biriktirilgen gaz-hımııalyq keshenge jetkizýdi kózdeıdi. Osyndaı qujatqa qol qoıý, «QazMunaıGaz» UK» AQ qazaqstandyq munaı kompanııasymen birlesken kásiporyn sheńberinde AirLiquide kompanııasynyń Qazaqstandaǵy qyzmetin damytýda kezekti qadam boldy.
Sondaı-aq, forým sheńberinde energetıka, mal sharýashylyǵy, mıneraldardy óndirý, munaı-gaz ónerkásibi, óndiristerdi tsıfrlandyrý men avtomattandyrý salalaryn qamtıtyn kompanııalarmen 10-ǵa jýyq ekijaqty kezdesý ótkizildi. Onyń ishinde: IDEMIA, AIRBUS GROUP, CNCR Group, ORANO MINING, BureauVeritas, IFP EnergiesNouvelles jáne taǵy basqalary bar.
Búgin Frantsııa Qazaqstannyń negizgi saýda-ınvestıtsııalyq seriktesteriniń bestigine kiredi. Osy jyldary ózara taýar aınalymy $50 mlrd deıin jetti. Sonymen qatar, ýran, munaı-gaz, tıtan ónerkásibinde, kóliktik mashına jasaý, qurylys materıaldaryn, azyq-túlik ónimin óndirý jáne basqa da salalarda birqatar iri birlesken ınvestıtsııalyq jobalar iske asyryldy, bul sońǵy 14 jylda $15,6 mlrd kóleminde frantsýz ınvestıtsııalaryn tartýǵa múmkindik berdi. Qazaqstanda frantsýz kapıtalynyń qatysýymen barlyǵy 130-dan astam kompanııa jumys jasaıdy.
Osyndaı jaqsy nátıjelerge qaramastan, ekonomıkalyq saladaǵy ekijaqty seriktestikti keńeıtip tereńdetý úshin aıtarlyqtaı áleýet bar, ásirese Qazaqstan men Frantsııa Prezıdentteri aıqyndaǵan úsh basym sektorda: balamaly energetıka, aýyl sharýashylyǵy jáne tsıfrlandyrý.
Roman Sklıar sózin qorytyndylaı kele búgingi Qazaqstan — bul bıznesti tıimdi júrgizý úshin jańa múmkindikter men zor áleýet ekenin atap ótti. Bizdiń el ınvestıtsııalyq ahýaldy jaqsartýǵa baǵyttalǵan dáıekti túrde reformalar júrgizýde, kásipkerlermen ashyq dıalog qamtamasyz etýde jáne ınvestıtsııalardy tartý úshin ınfraqurylymdy jetildirýde. Budan ózge, Qazaqstan bıznes júrgizý úshin eń jaqsy sharttar usynady jáne saýda-sattyq jasap, joǵarǵy qosylǵan qunymen eksportqa baǵyttalǵan, básekege qabiletti óndiristerdi qurýǵa ınvestıtsııa salýǵa daıyn frantsýz seriktesterin tartýǵa múddeli.
