Roman Sklıar ExxonMobil kompanııasynyń basshylyǵymen kezdesti
ASTANA.KAZINFORM - Qazaqstan Respýblıkasy Premer-mınıstriniń birinshi orynbasary Roman Sklıar ExxonMobil kompanııasynyń aǵa vıtse-prezıdenti Pıter Lardenmen kezdesý ótkizdi, dep habarlaıdy Úkimettiń baspasóz qyzmeti.
Jıyn barysynda taraptar munaı-gaz salasyndaǵy yntymaqtastyqtyń negizgi baǵyttaryn jáne Qazaqstan aýmaǵyndaǵy birlesken jobalardyń júzege asyrylýyn talqylady.
Elimizdiń munaı-gaz salasyndaǵy eń iri jáne strategııalyq mańyzdy jobalarynyń biri retinde «Teńizshevroıl» JShS qyzmetine erekshe nazar aýdaryldy. Óndiristik kórsetkishterdiń turaqtylyǵyn qamtamasyz etýdiń jáne Teńiz ken ornynyń resýrstyq bazasyn odan ári tıimdi ıgerýdiń mańyzdylyǵy atap ótildi.
Óz kezeginde ExxonMobil aǵa vıtse-prezıdenti Pıter Larden Qazaqstan Respýblıkasymen ózara is-qımyldyń joǵary deńgeıin atap ótip, uzaqmerzimdi ınvestıtsııalyq jobalardy júzege asyrý úshin turaqty ári boljamdy retteýshi ortanyń mańyzdylyǵyna toqtaldy.
Qazaqstandyq qamtýdy damytý máseleleri, sonyń ishinde otandyq kompanııalardyń taýarlardy, jumystar men kórsetiletin qyzmetterdi jetkizýge qatysýyn keńeıtý, sondaı-aq lokalızatsııalaý men ınjenerlik quzyretterdi damytý máseleleri bólek qaraldy.
Sondaı-aq Premer-mınıstrdiń birinshi orynbasary elimizdegi jańa keleshegi zor ýchaskelerde jer qoınaýyn geologııalyq zertteý boıynsha júrgizilip jatqan aýqymdy jumystarǵa nazar aýdardy. Memleket tarapynan qabyldanyp jatqan sharalar resýrstyq bazany ulǵaıtý jáne salaǵa ınvestıtsııa tartý úshin qosymsha múmkindikter týǵyzady.
Kezdesý sońynda taraptar qolaıly ınvestıtsııalyq klımatty saqtaýdyń jáne birlesken jobalardy ózara tıimdi negizde júzege asyrýdyń mańyzdylyǵyn atap ótip, uzaqmerzimdi seriktestikti ári qaraı nyǵaıtýǵa beıildi ekenin jetkizdi.
Osyǵan deıin Roman Sklıardyń GFR Syrtqy ister stats-mınıstrimen kezdesýinde qandaı máseleler kóterilgeni týraly jazdyq.
