Roman Sklıar Ekibastuzdaǵy apattan alynǵan sabaq týraly aıtty
«Apattyń sebepterin eskermegende, bastysy – tótenshe jaǵdaıdyń saldaryn joıý jumystary naqty uıymdastyryldy. Apat qanshalyqty aýqymdy bolsa da, ony joıýdyń naqty ortaq algorıtmi bolýy kerek. ıAǵnı, tótenshe jaǵdaıda kim jáne qalaı áreket etýi kerek. Óıtkeni, barlyǵy soǵan baılanysty. Biz kommýnaldyq apattardyń saldaryn tez ári sapaly joıýǵa tıispiz.
Moıyndaımyn, kópqabatty úılerge jylýdy 5-10 kún ishinde berý – óte uzaq ýaqyt. Eger mundaı jaǵdaı oryn alsa, biz ne isteý kerektigin bilýimiz kerek. Sýdy tógý – birinshi kezekte oıda bolýy tıis qarapaıym áreket», - dedi Roman Sklıar.
Ekibastuzda apattyń saldaryn joıý, jylý júıelerin qalypqa keltirý áli de jalǵasyp jatyr.
«Tótenshe jaǵdaı rejımi alynǵanyna qaramastan, jumystar jalǵasatyn bolady. Eki turǵyn úı kesheninde sý qubyry men káriz júıelerin qalpyna keltirip jatyrmyz. Jylýǵa qosylmaǵan 40 jekemenshik úı qalyp otyr, jumystar jalǵasýda. Jalpy qalany jylýmen turaqty qamtý máselesinde qaýip joq. Kommýnaldyq qyzmetter jumystaryn sapaly atqaratynyna senemin», - dep túıindedi ol.
Onyń málimdeýinshe, apattyń sebebi muqııat tergeýden keıin jarııalanady. Sondaı-aq Roman Sklıar eshkim jaýapkershilikten jaltarmaıtynyn atap ótti.
Suhbat aıasynda vıtse-premer Ekibastuzdaǵy apat kezindegi páter ıeleri kooperatıvteriniń kemshiligin aıtty.
Sonymen qatar qaladaǵy jaǵdaı týraly áleýmettik jelilerde taraǵan jalǵan aqparatqa ergenderge qatysty oıyn bildirdi.
Foto Valerııa Býgaev