Roman Sklıar: Ekibastuzda jańa ınnovatsııalyq kásiporyn jyl saıyn 300 myń temirjol dóńgelegin shyǵarady

ASTANA. KAZINFORM – Zamanaýı eýropalyq jabdyqtar ornatylǵan Ekibastuzdaǵy otandyq zaýyttyń ónimi úzdik álemdik úlgilerge sáıkes keledi. Kásiporyn Qazaqstannyń ǵana emes, kórshi memleketterdiń de qajettiligin qamtamasyz etedi. Óndiris qýatty – jylyna 300 myń temirjol dóńgelegi, bul rette ónimniń 70% eksportqa jóneltiledi. Bul týraly birinshi vıtse-premer Roman Sklıar Primeminister.kz saıtyna bergen suhbatynda aıtty. 

Birinshi vıtse-premer Roman Sklıar EAEO naryǵynda qazaqstandyq óndirýshiniń bolýyna baılanysty Reseıdiń Ónerkásip jáne saýda mınıstrligi 2019 jyly RF-la dóńgelek juptaryn shyǵaratyn jańa zaýyt salý ıdeıasynan bas tartqanyn aıtty.  

«Bizdiń óndiris álemdegi eń jaqsy úlgilerden esh kem túspeıdi jáne olar temirjol mashınasyn jasaý salasyndaǵy basqa baǵyttarǵa kóńil bólemiz degen durys sheshim qabyldady. Básekelestik bolýy kerek, bul bizdiń óndirýshilerdi yntalandyrady. Biraq satyp alý týraly sóz bolǵanda, ulttyq rejımnen alý rejımi engiziledi nemese óndirýshiler óz ónimderiniń básekege qabiletti jáne ishki naryqta suranysqa ıe bolýy úshin belgili bir sýbsıdııalar alady. Birtutas ekonomıkalyq keńistikte bola otyryp, biz ulttyq múddelerge qamqorlyq jasaýymyz kerek. Úkimettiń basty mindeti — qoldanystaǵy óndirister men jumys oryndaryn saqtaý jáne jańa óndirister men jumys oryndaryn ashý», - dedi Roman Sklıar.