Roman Sklıar BJZQ qarajatyna vagon satyp alý jobasy týraly pikir bildirdi

ASTANA. KAZINFORM – Premer-Mınıstrdiń birinshi orynbasary Roman Sklıar Biryńǵaı jınaqtaýshy zeınetaqy qorynyń qarajatyn «Báıterek» holdıngi arqyly vagon satyp alýǵa jumsaýdy kózdeıtin joba týraly pkiri bildirdi.

«Men BJZQ-nyń jekelegen jobalaryna aktsent jasamas edim. Kópjyldyq quqyq qoldanysyndaǵy tájirıbe de qarjy ınstıtýttarynyń naryqtan qaryzǵa aqsha tartýy bar. Ol BJZQ aqshasy da bolýy múmkin, ekinshi deńgeıli bankterdiń nemese jeke ınvestorlardyń qarajaty bolýy múmkin. Bul jerde alynǵan qarajattyń qaıtatynyna kepil bolǵany mańyzdy. BJZQ qarajatyn alý óte sezimtal másele ekeni túsinikti. Bul aqsha qorǵa jarna aýdaryp otyrǵan ár azamatqa tabys ákelip, keleshektegi zeınetaqy jınaǵyna ınvestıtsııalyq kiristi qamtamasyz etýi kerek», - dedi ol ınvestorlardyń quqyqtaryn qorǵaý jónindegi forým aıasynda BAQ ókilderine bergen suhbatynda.

Onyń sózinshe, BJZQ aqshasy qandaı jobaǵa tartylǵany emes, neshe paıyzben tartylǵany mańyzdy.

«Sonymen birge mundaı jobalardyń táýekeli úlken bolmaǵany da mańyzdy. Qarjy ınstıtýttarynyń, onyń ishinde «Báıterektiń» mindeti - osy máselelerdi tolyqqandy sheshý. «Báıterek» - 100 paıyz memlekettik holdıng. Sondyqtan BJZQ qarajatynyń qaıtatynyna da 100 paıyz kepildik bar. Osyny túsiný mańyzdy. Al holdıngtiń qandaı jobalarǵa nesıe tartatyny ekinshi másele. Sondyqtan men 100 paıyz kepildik bar ekenine jáne paıyzdyq mólsherlemesine kóbirek mán berý durys der edim», - dedi Roman Sklıar.