Roman Sklıar Boao Azııalyq forýmyna qatysty
ASTANA. KAZINFORM — Boao Azııalyq forýmynyń (BAF) 24-shi sessııasyna qatysý sheńberinde QR Premer-mınıstriniń birinshi orynbasary Roman Sklıar QHR Memlekettik keńesiniń vıtse-premeri Dın Sıýesıanmen kezdesti. Bul týraly QR Úkimetiniń baspasóz qyzmeti málim etti.
Kezdesý barysynda Roman Sklıar Qazaqstan–Qytaı máńgi ári jan-jaqty strategııalyq seriktestigin nyǵaıtýǵa jáne saýda-ekonomıkalyq, ınvestıtsııalyq, mádenı-gýmanıtarlyq ózara yqpaldastyqty odan ári damytýǵa kúsh salýǵa daıyn ekenin bildirdi.
Dın Sıýesıan eki el arasyndaǵy saýda-ekonomıkalyq baılanystardy tereńdetýdiń jáne memleketter basshylary arasynda qol jetkizilgen ýaǵdalastyqtardy iske asyrýdyń mańyzdylyǵyn atap ótti.
Taraptar QR–QHR Yntymaqtastyq komıteti otyrysynyń qorytyndylaryna oń baǵa berip, óńiraralyq yntymaqtastyqty damytý máselelerin talqylady. Eki el úkimetteriniń basshylyǵy deńgeıindegi turaqty kezdesýlerdiń mańyzdylyǵyn atap ótip, barlyq ózekti ekijaqty máseleler boıynsha tyǵyz jumys baılanystaryn saqtaýǵa kelisti.
Roman Sklıar qytaılyq áriptesin Qazaqstanǵa saparmen kelýge shaqyrdy.
QR Premer-mınıstriniń birinshi orynbasary Roman Sklıar «Ózgermeli álemdegi Azııa: ortaq bolashaq jolynda» taqyrybynda ótken Boao Azııalyq forýmynyń 24-shi sessııasynyń ashylý saltanatyna qatysty.
Forýmǵa 60-tan astam elden kelgen delegatsııalardyń basshylary jáne 2 myńnan astam úkimettik uıymdardyń jetekshileri, iri kompanııalardyń, ǵylymı toptardyń ókilderi jáne sarapshylar qatysty.
Roman Sklıar BAF sheńberinde «Jahandyq jetkizý tizbeginiń turaqtylyǵyn saqtaý: baılanystyń róli» taqyrybynda ótken paneldik sessııasynda negizgi spıker retinde sóz sóıledi. Óz sózinde ol Azııa elderi arasyndaǵy saýda-ekonomıkalyq jáne kólik-logıstıkalyq yntymaqtastyqty nyǵaıtýdyń mańyzdylyǵyna, saýda kedergilerin azaıtý jáne jańa kólik baǵdarlaryn qalyptastyrý boıynsha birlesken jumysqa, sondaı-aq ózara jetkizý tizbekterin jetildirý úshin tsıfrlyq tehnologııalar men jasandy ıntellektini qoldanýǵa qatysýshylardyń nazaryn aýdardy. Qazaqstan delegatsııasynyń basshysy Azııa qurlyǵy elderine jańa múmkindikter «terezesin» asha otyryp, tyǵyz baılanys ornatýǵa shaqyrdy.
Tske sala keteıik, buǵan deıin Roman Sklıardyń tóraǵalyǵymen Investıtsııalar tartý jónindegi keńestiń kezekti otyrysy ótkenin habarlaǵan bolatynbyz.